शिक्षण पेसा छोडेर राजनीतिमा

पञ्चायती व्यवस्थाको विरोधमा खुलेर लागेका कारण उनी २०४४ सालमा शिक्षक पेसाबाट बर्खास्तीमा परे, जसलाई उनका समर्थकहरूले राजनीतिक प्रताडनाको उदाहरणका रूपमा लिन्छन्।

०००

काभ्रेपलाञ्चोक जिल्लाको प्रतिनिधिसभा निर्वाचन क्षेत्र नम्बर १ बाट नेपाली कम्युनिस्ट पार्टीका उम्मेदवार दिननाथ गौतम लामो समयदेखि क्रान्तिकारी राजनीतिमा सक्रिय रहँदै आएका अनुभवी नेता हुन् ।

२०२० सालमा काभ्रेपलाञ्चोकको चौंरीदेउरालीमा निम्नवर्गीय परिवारमा जन्मिएका गौतम सामान्य पारिवारिक परिवेशमा हुर्किएका हुन् ।

उनले प्लस टु तहसम्मको औपचारिक शिक्षा हासिल गरेका छन् । प्रारम्भमा शिक्षण पेसामा संलग्न गौतम पछि राजनीतिलाई नै जीवनको मुख्य मार्ग बनाउँदै अघि बढेका व्यक्ति हुन् ।

दिननाथ गौतमको राजनीतिक जीवन विद्यार्थीकालदेखि नै सुरु भएको देखिन्छ । २०३६ सालमा भएको विद्यार्थी आन्दोलनमार्फत उनको संगठित राजनीतिक यात्रा आरम्भ भएको हो ।

शिक्षण पेसा गर्दै राजनीतिमा सक्रिय रहेका उनी नेकपा (मशाल) को पार्टी सदस्य बनेर पञ्चायती व्यवस्था विरुद्धको आन्दोलनमा सहभागी भए ।

पञ्चायती व्यवस्थाको विरोधमा खुलेर लागेका कारण उनी २०४४ सालमा शिक्षक पेसाबाट बर्खास्तीमा परे, जसलाई उनका समर्थकहरूले राजनीतिक प्रताडनाको उदाहरणका रूपमा लिन्छन्। यस घटनाले उनलाई अझ सशक्त रूपमा राजनीतिक संघर्षमा होमिन प्रेरित गरेको देखिन्छ ।

२०४८ सालमा भएको एकता सम्मेलनबाट जिल्ला सदस्यमा चयन भएका गौतम २०५२ सालदेखि पूर्णकालीन रूपमा भूमिगत हुँदै माओवादी सशस्त्र युद्धमा संलग्न भए ।

उनले तत्कालीन बेथान मोर्चाको कमान्ड सम्हाल्नुका साथै काभ्रे जिल्लामा अध्यक्ष, सह–इन्चार्ज, इन्चार्ज हुँदै केन्द्रीय सदस्यसम्मका महत्वपूर्ण पार्टी जिम्मेवारी निर्वाह गरेका छन् । लामो समयसम्म भूमिगत र खुला दुवै चरणको राजनीतिमा सक्रिय रहनु उनको राजनीतिक जीवनको प्रमुख विशेषता हो ।

सशस्त्र संघर्षपछि स्थानीय तहको राजनीतिमा सक्रिय बनेका गौतमले २०७४ देखि २०७९ सालसम्म चौंरीदेउराली गाउँपालिकाको अध्यक्षको जिम्नेवारी सम्हाले ।

स्थानीय सरकार सञ्चालनको प्रत्यक्ष अनुभव भएका कारण उनी स्थानीय स्तरमा परिचित र प्रभावशाली नेताका रूपमा चिनिन्छन् । जनतासँग नजिक रहने, संगठनलाई प्राथमिकता दिने र संघर्षबाट आएको नेताको छवि उनको राजनीतिक पहिचान बनेको छ ।

अनुकूलता

• विद्यार्थी आन्दोलन, सशस्त्र संघर्षको पृष्ठभूमि
• स्थानीय तहको कार्यकारी अनुभव
• संघर्षशील र प्रतिबद्ध छवि

प्रतिकूलता

• सशस्त्र द्वन्द्वकालीन पृष्ठभूमिप्रति आलोचना
• माओवादी युद्धसँग जोडिएको इतिहास केही मतदाता वर्गका लागि अझै विवादास्पद विषय बन्न सक्छ
• राष्ट्रिय स्तरको फराकिलो पहिचान निर्माण गर्ने चुनौती