ह्याटिकको विरासत जोगाउने चाहना

नेकपा (एमाले)का उपाध्यक्ष गोकर्णराज विष्ट गुल्मीको इस्मा–४, वाजमा २०२२ सालमा जन्मिएका हुन् । औपचारिक राजनीति २०३६ सालमा विद्यार्थी आन्दोलनबाट शुरु गरे । अनेरास्ववियुको प्रारम्भिक कमिटी सदस्य हुँदै गुल्मी अध्यक्ष बनेर काम गरे ।

२०४४ साउन ४ गते पार्टी सदस्यता प्राप्त गरेका विष्ट २०५६ सालमा प्रजातान्त्रिक राष्ट्रिय युवा संघ (प्ररायुसं) को अध्यक्ष निर्वाचित भए । दुई कार्यकाल प्ररायुसंको अध्यक्षको जिम्मेवारी पूरा गरेपछि एमाले बागमती अञ्चल कमिटी सदस्य हुँदै केन्द्रीय प्रचार विभाग प्रमुख, संगठन विभाग प्रमुख र युवा संगठनको केन्द्रीय विभाग प्रमुख बने ।

सातौं महाधिवेशनबाट एमाले केन्द्रीय कमिटी सदस्यमा निर्वाचित भए । नवौं र दशौं महाधिवेशनबाट सचिव चयन भएका उनी ११औं महाधिवेशनबाट उपाध्यक्षमा निर्वाचित भए । २०६८ मा ऊर्जा मन्त्री र २०७४ मा श्रम, रोजगार तथा सामाजिक सुरक्षा मन्त्रालयको नेतृत्व गरे ।

२०५६, २०६४, २०७०, २०७४ र २०७९ मा चुनाव लडेका अनुभवी नेता हुन्, विष्ट । उनी तीमध्ये २०६४ मा बाहेक सबै निर्वाचनमा परिणाम आफ्नो पक्षमा पार्न सफल भए । पहिलो संविधानसभा चुनावमा माओवादीका चन्द्रबहादुर थापासँग १ हजार ३९८ मतले पराजित भएका थिए ।

२०७९ मा एकीकृत समाजवादीबाट उम्मेदवारी दिएकी रामकुमारी झाँक्रीलाई २ हजार मतले पराजित गरेका थिए । विष्टले २८ हजार ४७६ र झाँक्रीले २६ हजार ४४१ भोट पाएका थिए ।

यो क्षेत्रमा नेपाली कांग्रेसका भुवनप्रसाद श्रेष्ठ, नेपाली कम्युनिष्ट पार्टीका श्रीराम महत, राष्ट्रिय स्वतन्त्र पार्टीका गोविन्द पन्थी लगायतले उम्मेदवारी दिएका छन् ।