जनताको आक्रोश झेल्दै हरि ढकाल

२०७९ सालको निर्वाचनमा नेपाली कांग्रेस र नेकपा एमालेका नेतालाई पराजित गरेर चर्चामा आएका राष्ट्रिय स्वतन्त्र पार्टी (रास्वपा) का हरि ढकाल दोस्रो पटक चितवन–१ बाट उम्मेदवारी दिएका छन् । एमालेका निवर्तमान उपाध्यक्ष सुरेन्द्र पाण्डे र कांग्रेसका डा. विश्व पौडेललाई पराजित गरेका ढकालले 'सरप्राइज' जित निकाले ।

पूर्वी चितवनको रत्ननगर–१५, पिठुवामा २०४० सालमा जन्मिएका ढकाल रास्वपा केन्द्रीय सदस्य छन् । उनी एमाले पृष्ठभूमिबाट आएका हुन् । विद्यालय र क्याम्पसमा पढ्दा उनी एमालेको विद्यार्थी संगठन अनेरास्ववियुमा आवद्ध भए । ढकाल अनेरास्ववियु चितवनको सचिव समेत बने ।

व्यवसायमा विभिन्न आरोह अवरोह भोगेका उनी राजनीति र व्यवसाय छाडेर आध्यात्मिक मार्गमा समेत लागे केही समय । योग, ध्यान र तपस्याका विभिन्न कार्यक्रममा सक्रिय रहे ।

२०७९ सालमा भएको प्रतिनिधिसभाको निर्वाचनमा चितवन क्षेत्र नं. १ बाट ३४ हजार १८९ मतसहित विजयी भएका थिए । समानुपातिकमा रास्वपाले ३४ हजार ६९१, एमालेले २४ हजार ६ र कांग्रेसले १६ हजार ६९५ मत पाएको थियो ।

दोस्रोपटक चितवन–१ बाट उठेका ढकालले निर्वाचन जितेपछि आफ्नो निर्वाचन क्षेत्रमा काम नगरेको भनेर आलोचना खेपेका छन् । त्यही भएर उनलाई अघिल्लो बेलाको जस्तो सहज अवस्था छैन । अघिल्लोपटक यो क्षेत्रमा घण्टीमा भोट दिँदा रवि लामिछानेलाई जान्छ भन्ने हल्ला चलाइएको थियो । रुष्ट बनेका मतदाता ढकालका लागि चुनौती बन्न सक्छ ।

अघिल्लो निर्वाचनमा जस्तो एमाले नेता सुरेन्द्र पाण्डे र कांग्रेसका डा. विश्व पौडेल जस्ता ‘हेभिवेट’ उम्मेदवार नहुनु ढकालका लागि अनुकूलता हो ।

प्रस्तुतिः सुवास पण्डित