कृषि पृष्ठभूमि र ग्रामीण मुद्दाका प्रतिनिधि

कृषक पृष्ठभूमि, स्थानीय राजनीतिमा लामो अनुभव र संगठनप्रतिको निरन्तरताका कारण साहलाई राप्रपाले अनुभवी र जरा गाडिएको उम्मेदवारका रूपमा अघि सारेको देखिन्छ।

०००

राष्ट्रिय प्रजातन्त्र पार्टी (राप्रपा) ले बारा क्षेत्र नम्बर १ बाट प्रतिनिधिसभा सदस्यका लागि लक्ष्मीप्रसाद साहलाई उम्मेदवार बनाएको छ ।

कृषि पेसासँग आबद्ध, स्थानीय राजनीतिमा लामो समयदेखि सक्रिय र ग्रामीण समाजका मुद्दासँग नजिकबाट जोडिएका साहलाई राप्रपाले अनुभवी उम्मेदवारका रूपमा अघि सारेको हो ।

२०२६ साल वैशाखमा जन्मिएका साह ठाकुर साह कलवार र पतसिया देवीका सुपुत्र हुन्। बारा जिल्लाको कोल्हवी नगरपालिका–१ मा जन्मिएका साहले एसएलसीसम्मको औपचारिक शिक्षा हासिल गरेका छन् ।

तीन दशकभन्दा बढी समय नेपाली कांग्रेसको स्थानीय राजनीतिमा सक्रिय रहेका साह पेसाले कृषि कर्ममै संलग्न रहँदै आएका छन् । स्थानीय समाज, किसानका समस्या र ग्रामीण जीवनका सवालमा उनले लामो समयदेखि आवाज उठाउँदै आएका छन् ।

साहको राजनीतिक यात्रा २०५६ सालदेखि सुरु भएको हो। उनले २०७८ सालसम्म निरन्तर नेपाली कांग्रेसको स्थानीय कमिटीमा रहेर सक्रिय राजनीति गरे। लामो राजनीतिक अनुभवपछि २०७८ सालमा कांग्रेस परित्याग गरी उनी राष्ट्रिय प्रजातन्त्र पार्टीमा आबद्ध भए।

२०७९ सालको प्रदेशसभा निर्वाचनमा साह बारा क्षेत्र नम्बर १ (क) बाट राप्रपाका तर्फबाट उम्मेदवार बनेका थिए। उक्त निर्वाचनमा उनले तेस्रो स्थान हासिल गर्दै स्थानीय स्तरमा आफ्नो राजनीतिक उपस्थिति देखाएका थिए।

प्रतिनिधिसभा निर्वाचनमा साह पहिलो पटक उम्मेदवार बनेका हुन्। हाल उनी राष्ट्रिय प्रजातन्त्र पार्टी बारा जिल्ला समिति सदस्य तथा केन्द्रीय महाधिवेशन प्रतिनिधिको जिम्मेवारीमा रहेका छन्।

कृषक पृष्ठभूमि, स्थानीय राजनीतिमा लामो अनुभव र संगठनप्रतिको निरन्तरताका कारण साहलाई राप्रपाले अनुभवी र जरा गाडिएको उम्मेदवारका रूपमा अघि सारेको देखिन्छ।

अनुकूलता

• कृषि र ग्रामीण जीवनको प्रत्यक्ष अनुभव
• तीन दशकभन्दा बढी समय स्थानीय तहमा सक्रिय
• स्थिर र पहिचानयुक्त छवि

प्रतिकूलता

• प्रतिनिधिसभामा पहिलो पटक प्रतिस्पर्धा
• दल परिवर्तनको आलोचना
• सीमित संगठनात्मक शक्ति