पालिकाको पराजय बिर्साउन प्रयासरत लंकबहादुर

२०४६ साल चैत १६ गते डोल्पाको कालिकामा जन्मिएका लंकबहादुर रोकाया नेकपा एमालेबाट डोल्पाका लागि उम्मेदवार छन् । २०६३ मा काठमाडौंको ताहाचल क्याम्पसमा १२ कक्षाको अध्ययन गर्दै गर्दा एमालेनिकट विद्यार्थी संगठन अनेरास्ववियुको सदस्यता लिएका रोकाया त्यसयता एमाले राजनीतिमा सक्रिय छन् ।

माध्यमिक शिक्षा सकेर डोल्पा फर्केपछि उनले केही वर्ष पत्रकारिता गरे । उनले राष्ट्रिय समाचार समिति र रेडियो डोल्पा एफएममा करिब तीन वर्ष काम गरेका थिए । जिल्ला फर्किएपछि उनी एमालेकै युवा संगठन युवा संघको जिल्ला कमिटी सदस्य बनेका थिए ।

२०६८ सालमा एमाले डोल्पा जिल्ला कमिटी सदस्य बनेका उनी २०७४ सालको स्थानीय तह निर्वाचनमा मुड्केचुला गाउँपालिकाको अध्यक्षमा प्रतिस्पर्धा गरेका थिए । त्यसबेला उनी तत्कालीन नेकपा माओवादी केन्द्रका उम्मेदवार दत्तबहादुर शाहीसँग २ मतले पराजित भए । 

स्थानीय तहको चुनावमा पराजित बनेपछि उनी एमालेको मुड्केचुला गाउँ कमिटी इन्चार्ज हुँदै डोल्पा प्रदेश क्षेत्र ‘२’ को क्षेत्रीय इन्चार्ज बने । २०७८ मा उनी नेकपा एमालेको छैटौं जिल्ला अधिवेशनबाट जिल्ला सचिवमा निर्विरोध चयन भए । पार्टी सचिव रहेकै बेला उनले २०७९ सालको स्थानीय तह निर्वाचनमा मुड्केचुला गाउँपालिकाको अध्यक्षमा पुन: प्रतिस्पर्धा गरे ।

उक्त चुनावमा पनि रोकाय तत्कालीन माओवादीका उम्मेदवार शाहीसँग ३७ मतले पराजित भए ।

अनुकूलता :

विद्यार्थी, युुवा हुँदै जिल्लाको पार्टी राजनीतिमा सक्रिय छन् । युवा उमेरका कारण युवामाझ सहजै घुलमिल हुन सक्छन् । केही वर्ष पत्रकारितासमेत गरेकाले जिल्लाका समस्याबारे जानकार छन् ।

प्रतिकूलता :

पहिलो पटक संघीय संसद्को चुनाव लड्दैछन् । स्थानीय तहमै दुईपटक पराजित भएकालाई प्रतिनिधिसभाको उम्मेदवार बनाउँदा पार्टीभित्र असन्तुुष्टि छ ।

व्यक्तिगत विवरण

नाम: लंकबहादुर रोकाया

जन्म : २०४६ साल चैत १६

जन्मस्थान : डोल्पा

स्थायी ठेगाना:  डोल्पा मुड्केचुला गाउँपालिका भोट

शिक्षा: प्सल टू

राजनीतिक टाइमलाइन

२०६३ : अनेरास्ववियू सदस्य

२०६८ : एमाले डोल्पा जिल्ला कमिटी सदस्य

२०७४ : मुड्केचुला गाउँपालिका अध्यक्षमा पराजित

२०७८ : एमालेको छैटौं जिल्ला अधिवेशनबाट सचिव चयन

२०७९ : मुड्केचुला गाउँपालिकाको अध्यक्षमा पुन: उम्मेदवार र पराजित

२०८२ : प्रतिनिधिसभा सदस्यको उम्मेदवार