अनुभव र जनसम्पर्कको बल

ग्रासरुटदेखि केन्द्रीय नेतृत्वसम्मको यात्रा तय गरेका महेन्द्रकुमार राय महोत्तरी-४ मा कांग्रेसका भरपर्दा उम्मेदवारका रूपमा मैदानमा छन् ।

०००

महोत्तरी निर्वाचन क्षेत्र नम्बर ४ बाट प्रतिनिधिसभामा प्रतिनिधित्व गर्दै आएका महेन्द्रकुमार राय नेपाली कांग्रेसका अनुभवी, निष्ठावान र प्रभावशाली नेता हुन् । मधेश प्रदेशको राजनीतिमा लामो समयदेखि सक्रिय रहेका रायलाई स्थानीयदेखि राष्ट्रिय तहसम्म सशक्त नेताका रूपमा चिनिन्छ ।

६६ वर्षीय राय महोत्तरीको औरही नगरपालिका-१, कविलाशमा स्थायी रूपमा बसोबास गर्दै आएका छन् । उनले त्रिभुवन विश्वविद्यालयबाट स्नातक तहसम्मको अध्ययन पूरा गरेका छन् । अध्ययन र राजनीतिक अभ्यासलाई सँगसँगै अघि बढाएका उनी व्यावहारिक र अनुभवजन्य राजनीतिमा विश्वास गर्ने नेताका रूपमा परिचित छन् ।

उनको राजनीतिक यात्रा करिब चार दशक लामो छ । यस अवधिमा उनले ग्रासरुट राजनीतिदेखि राज्यको उच्च तहसम्मको जिम्मेवारी सम्हाल्ने अवसर पाएका छन् ।

नेपाली कांग्रेसको संगठन निर्माण र विस्तारमा उनको उल्लेखनीय योगदान  छ । उनले तीन कार्यकालसम्म नेपाली कांग्रेस महोत्तरीको जिल्ला सभापतिको भूमिका निर्वाह गरिसकेका छन् ।

जिल्लास्तरमा बलियो संगठनात्मक पकड र जनतासँग नजिकको सम्बन्ध नै उनको राजनीतिक शक्तिको मुख्य आधार मानिन्छ । स्थानीय समस्या, जनभावना र क्षेत्रीय आवश्यकतालाई नजिकबाट बुझ्ने नेताका रूपमा उनी परिचित छन् ।

संसदीय र शासकीय अनुभवका हिसाबले पनि राय खारिएका नेता हुन् । २०५६ सालको आम निर्वाचनमा प्रतिनिधिसभा सदस्यमा निर्वाचित भएपछि उनले नेपाल सरकारको उद्योग, वाणिज्य तथा आपूर्ति राज्यमन्त्रीको जिम्मेवारी सम्हालेका थिए । उक्त भूमिकामा रहँदा उनले औद्योगिक विकास, आपूर्ति व्यवस्थापन र व्यापार प्रवर्द्धनका विषयमा काम गरेका थिए ।

संसदीय यात्रामा उतारचढाव आए पनि रायले आफ्नो क्षेत्रको विकास र जनसेवालाई निरन्तर प्राथमिकतामा राख्दै आएका छन् ।

२०७४ सालको निर्वाचनमा पराजित भए तापनि उनले राजनीतिक सक्रियता कायम राखे । २०७९ को आम निर्वाचनमा महोत्तरी क्षेत्र नम्बर ४ बाट २५ हजार ४२० मत प्राप्त गरी पुनः प्रतिनिधिसभा सदस्यमा निर्वाचित हुँदै पुनरागमन गरेका थिए ।

लामो राजनीतिक अनुभव, संगठनात्मक क्षमता, शासकीय अभ्यास र स्थानीय तहमा रहेको गहिरो प्रभावका कारण आगामी निर्वाचनमा पनि महेन्द्रकुमार राय नेपाली कांग्रेसका तर्फबाट महोत्तरी क्षेत्र नम्बर ४ मा बलियो र निर्णायक उम्मेदवारका रूपमा उभिएका छन् ।

अनुकूलता

• करिब चार दशकको राजनीतिक अनुभव र संगठन निर्माणमा गहिरो पकड
• संसदीय तथा कार्यकारी अनुभव
• जिल्लास्तरमा बलियो जनसम्पर्क र स्थिर मताधार

प्रतिकूलता

• लामो राजनीतिक यात्राका कारण परिवर्तन चाहने मतदातालाई विश्वस्त पार्नुपर्ने चुनौती
• क्षेत्रीय स्तरमा बढ्दो प्रतिस्पर्धा र बहुपक्षीय उम्मेदवारी
• नयाँ पुस्ताको अपेक्षा र समकालीन मुद्दासँग अझ प्रभावकारी रूपमा जोडिनुपर्ने दबाब