तेस्रो पटक संसद् पुग्ने चाहना

२०७९ मंसिरमा प्रतिनिधिसभा सदस्यको निर्वाचन जितेको केही महिनामै डा. चन्द्रकान्त भण्डारी ठूलो दुर्घटनामा परे । काठमाडौं, बुद्धनगरस्थित निवासमा ग्यास लिक भएर आगलागी हुँदा भण्डारी र उनकी आमा गम्भीर घाइते भए । आमाको उपचारको क्रममा निधन भयो । भारतमा लामो उपचारपछि भण्डारी फर्किए ।

गुल्मीको छत्रकोट, हुँगा गाउँमा २०१८ सालमा जन्मिएका डा. भण्डारी किशोरावस्थामै नेपाली कांग्रेसप्रति आकर्षित भए । उनी २०३३ बाट कांग्रेसको गतिविधिमा सक्रिय हुन थाले ।

पञ्चायती व्यवस्था विरुद्धको आन्दोलनका क्रममा पक्राउ परेर पाँच वर्ष जेल जीवन बिताएका उनी २०३६ र २०४६ को आन्दोलनमा सहभागी थिए ।

२०४८ सालमा नेपाल विद्यार्थी संघको महामन्त्रीको जिम्मेवारीमा पुगेका भण्डारी २०६७ पछि निरन्तर पार्टीको केन्द्रीय सदस्य छन् । उनी २०७८ मंसिरमा सम्पन्न १४औं महाधिवेशनमा उप–सभापतिमा उठेर पराजित भएका थिए ।

भण्डारीले २०६४, २०७०, २०७४ र २०७९ राष्ट्रिय निर्वाचनमा उम्मेदवारी दिए । २०६४ र २०७४ मा एमालेका प्रदीप ज्ञवालीसँग पराजित भए । २०७० र २०७९ मा विजयी हुँदा उनका निकटतम प्रतिद्वन्द्वी तिनै ज्ञवाली थिए ।

२०७९ मा भण्डारीले माओवादी केन्द्र, एकीकृत समाजवादी र राष्ट्रिय जनमोर्चाको साथ पाएका थिए । त्यतिबेला ३३ हजार ७४४ मत पाएर उनी विजयी हुँदा ज्ञवालीले ३२ हजार १५२ भोट ल्याएका थिए । 

भण्डारीले एमालेका ज्ञवालीसँग पाँचौं पटक प्रतिस्पर्धा गर्दैछन् । नेपाली कम्युनिष्ट पार्टीबाट सुदर्शन बराल र रास्वपाबाट सागर ढकाल उठेका छन् ।