भुईंतहदेखि संसदसम्म पुग्ने आकांक्षा
भरतप्रसाद साह
नेपाली राजनीतिमा, विशेषगरी मधेस प्रदेशको वामपन्थी आन्दोलनमा, भरतप्रसाद साह एक स्थापित र अनुभवी नाम हुन्। ५३ वर्षीय साह महोत्तरी जिल्लाको गौशाला नगरपालिका–फुलकाहाका स्थायी बासिन्दा हुन्। भुईँतहको राजनीतिबाट अघि बढेका साहले आफ्नो राजनीतिक यात्रालाई तल्लो निकायदेखि राज्यको उच्च तहसम्म विस्तार गरेका छन्।
साहको राजनीतिक यात्रा करिब तीन दशक लामो छ। उनले जननिर्वाचित प्रतिनिधिका रूपमा आफ्नो पहिलो अनुभव वि.सं. २०५४ सालमा गाउँ विकास समिति (गाविस) को अध्यक्ष भएर हासिल गरेका थिए। स्थानीय तहका समस्या र विकासको आवश्यकतालाई नजिकबाट बुझेका साहले नेपालको ऐतिहासिक राजनीतिक परिवर्तनका चरणहरूमा पनि सक्रिय भूमिका निर्वाह गरेका छन्।
उनी वि.सं. २०६३ सालमा अन्तरिम व्यवस्थापिका संसदका सदस्य बने भने, २०६४ सालको पहिलो संविधान सभा निर्वाचनमा संविधान सभा सदस्यको रूपमा निर्वाचित भई मुलुकको नयाँ संविधान निर्माण प्रक्रियामा प्रत्यक्ष सहभागी भए। यसले उनलाई राष्ट्रिय राजनीतिमा अनुभवी र विश्वसनीय नेताका रूपमा स्थापित गर्यो।
प्रदेश संरचनामा प्रवेशपछि साहले मधेस प्रदेशको राजनीतिमा नेतृत्वदायी भूमिका खेले। उनी दुई पटक मधेस प्रदेश सभा सदस्यमा निर्वाचित भई संसदीय अभ्यासमा प्रभाव जमाउन सफल भए।
यस क्रममा उनले मधेस प्रदेश सरकारमा आन्तरिक मामिला तथा सञ्चार मन्त्री जस्तो महत्वपूर्ण जिम्मेवारी सम्हाले। मन्त्रीका रूपमा उनले प्रदेशको सुरक्षा संयन्त्र सुदृढीकरण र सञ्चार क्षेत्रको विकासमा उल्लेखनीय कामहरू गरेको उनका समर्थकहरूको दाबी छ।
हाल उनी नेपाली कम्युनिस्ट पार्टी (नेकपा) को तर्फबाट पाँचकुने तारा चुनाव चिन्ह लिएर महोत्तरी प्रतिनिधिसभा निर्वाचन क्षेत्र नम्बर ४ बाट प्रतिस्पर्धामा उत्रिएका छन्।
गाउँको अध्यक्षदेखि प्रदेशको मन्त्रीसम्मको लामो र परिपक्व अनुभव बोकेका साहले यसपटक मधेसको अधिकार, संघीयताको वास्तविक कार्यान्वयन र क्षेत्रको समग्र आर्थिक–सामाजिक विकासलाई आफ्नो मुख्य एजेन्डा बनाएका छन् ।
स्थानीयस्तरमा राम्रो पकड भएका र जनताको सुख–दुःखमा जोडिएका नेताका रूपमा उनलाई यस क्षेत्रका प्रभावशाली उम्मेदवारमध्ये एक मानिन्छ।
अनुकूलता
• तीन दशक लामो राजनीतिक अनुभव
• शासन र नीति निर्माणको प्रत्यक्ष अनुभव
• स्थानीय र क्षेत्रीय पकड बलियो
प्रतिकूलता
• लामो समय सत्तासँग जोडिएको छवि
• वामपन्थी राजनीति प्रतिको थकान
• नयाँ वैकल्पिक शक्तिसँग कडा प्रतिस्पर्धा
भरतप्रसाद साह को उम्मेदवारि कस्तो लागयो ?
