संसद् प्रवेशको दोस्रो प्रयास

२०३६ सालको जनमत संग्रह, भद्र अवज्ञा आन्दोलनदेखि २०४६ सालको जनआन्दोलनसम्म उनी सक्रिय सहभागी रहे ।

०००

विद्यार्थी आन्दोलनबाट राजनीति सुरु गरेका बालकृष्ण थापा दोस्रोपल्ट प्रतिनिधिसभा प्रवेशको लक्ष्यसहित भोजपुरमा चुनावी मैदानमा उत्रिएका छन् ।

२०२५ सालताका नेविसंघले भूमिगत गतिविधि सञ्चालन गरिरहेको थियो । त्यही क्रममा भोजपुरका १६ वर्षे किशोर बालकृष्ण थापा राजनीतिमा जोडिए ।

२०२७ सालमै उनी नेविसंघ भोजपुरको संस्थापक सभापति बने । त्यतिबेला नेविसंघको केन्द्रीय सभापति शेरबहादुर देउवा थिए। लामो राजनीतिक यात्रापछि उनै बालकृष्ण थापा यसपटक नेपाली कांग्रेसबाट प्रतिनिधिसभा सदस्यका उम्मेदवार बनेका छन् ।

कांग्रेसको लामो राजनीतिमा सक्रिय थापा भोजपुर नगरपालिका-७, कोदारमा २००९ साल असार २० गते जन्मिएका हुन्। उनले राजनीतिशास्त्रमा स्नातकोत्तर अध्ययन गरेका छन् ।

यो थापाको संसदीय निर्वाचनमा दोस्रो प्रयास हो । २०७० मा सम्पन्न संविधानसभा निर्वाचनमा उनी पराजित भएका थिए, जहाँ उनलाई नेकपा एमालेका शेरधन राईले हराएका थिए । यस पटक भने चुनावी प्रतिस्पर्धाबाट जित निकाल्ने लक्ष्यसहित उनी मैदानमा उत्रिएका छन् ।

माध्यमिक तहको अध्ययनपछि उनी भोजपुरबाट विराटनगर गएर स्नातक अध्ययन पूरा गरे । थप अध्ययनका लागि काठमाडौं पुगेका थापाले अध्ययनसँगै राजनीतिक गतिविधिलाई निरन्तरता दिए।

२०३६ सालको जनमत संग्रह, भद्र अवज्ञा आन्दोलनदेखि २०४६ सालको जनआन्दोलनसम्म उनी सक्रिय सहभागी रहे ।

२०४६ सालमा नेपाली कांग्रेस भोजपुरको जिल्ला सदस्य बनेका थापा २०६८ मा जिल्ला सभापति निर्वाचित भए। यसबीच उनी महाधिवेशन प्रतिनिधि र महासमिति सदस्यको जिम्मेवारीमा पनि रहे ।

पार्टी भित्र सामूहिक नेतृत्व, भावनात्मक एकता र लोकतान्त्रिक कार्यशैली आवश्यक रहेको पक्षमा उनी निरन्तर वकालत गर्दै आएका छन् ।

राजनीतिक संघर्षका क्रममा उनले जेलजीवन पनि भोगेका छन् । २०२६ सालमा भोजपुरमा प्रश्नपत्र ‘आउट’ भएको विषयमा विवाद हुँदा विद्यार्थी आन्दोलन चर्कियो । त्यस क्रममा पक्राउ परेका महेन्द्र राईलाई रिहा गराउन भएको आन्दोलनमा थापा सक्रिय सहभागी थिए ।

घटनापछि उनीमाथि राजकाज मुद्दा चलाइयो र ९ महिना राजविराज जेल बस्नुपरेको अनुभव उनी स्मरण गर्छन् । यस्तै, २०२९ सालमा देवानसिं राईको हत्या भएपछि शोकसभा आयोजना गरेको आरोपमा उनलाई चार महिना जेलमा राखिएको थियो ।