प्रतिनिधिसभामा पुनरागमनको प्रयासमा रवीन्द्रराज शर्मा

२०७९ मा प्रतिनिधिसभा सदस्य पदका लागि एमाले उम्मेदवार थिए, रवीन्द्रराज शर्मा । उनका निकटका प्रतिस्पर्धी थिए, अम्मरबहादुर थापा । रवीन्द्रराज र अम्मरबहादुर लामो समयसम्म एउटै पार्टीमा क्रियाशील थिए,  पार्टीभित्रका प्रतिस्पर्धी पनि ।

२०७९ मा भने यी दुई फरक फरक दलका उम्मेदवार थिए । रवीन्द्रराज एमालेबाट उम्मेदवार बन्दा अम्मरबहादुर एमाले विभाजनपछि बनेको एकीकृत नेकपा समाजवादीबाट । दैलेख १ को यो रोचक प्रतिस्पर्धामा अम्मरबहादुर सफल भए । त्यसबेला अम्मरबहादुरलाई नेपाली कांग्रेस, तत्कालीन नेकपा माओवादी केन्द्रलगायत पाँच दलीय गठबन्धनको साथ थिया ।

यसपटक फेरि तिनै रवीन्द्रराज एमालेबाट उम्मेदवार छन् । चुनावी मैदान अन्य उम्मेदवारसहित अम्मरबहादुर पनि उभिएका छन् । अम्मरबहादुरको पार्टी फेरि परिवर्तन भएको छ । यसपटक उनी नेकपा एकीकृत समाजवादी र माओवादी केन्द्रसहित विभिन्न २३ दल र घटक मिलेर बनेको नेपाली कम्युनिष्ट पार्टीमा छन् । तर, अम्मरबहादुरलाई कांग्रेसको साथ छैन । कांग्रेसले युवा र महिला उम्मेदवार बासना थापालाई उठाएको छ ।

योपटक रवीन्द्रराज २०७९ को पराजयलाई अब जितमा बदल्नै प्रतीक्षामा छन् । उनीसँग २०७४ मै प्रतिनिधिसभा सदस्य बनेको अनुभव छ । तत्कालीन समयमा उनी नेकपा एमाले र नेकपा माओवादी केन्द्रको वाम गठबन्धनका साझा उम्मेदवार थिए । त्यसबेला उनले कांग्रेस उम्मेदवारलाई पराजित गरेका थिए । यसपटकको चुनावी प्रतिस्पर्धामा पनि उनी त्यही नतिजा दोहोर्‍याउने प्रयासमा छन् ।

१० असोज २०२१ मा दैलेखको नारायण नगरपालिका– २, जाहारकोटमा जन्मिएका रवीन्द्रराजको प्रतिनिधिसभामा तेस्रो प्रतिस्पर्धा हो ।

जिल्लाको राजनीतिमा कुशल संगठकका रूपमा चिनिएका उनी जिल्लाको भूगोल र ग्रामिण क्षेत्रका मतदातासँग पनि राम्रो पहुँच भएका नेता मानिन्छन् ।

६१ वर्षीय रवीन्द्रराज विद्यार्थी राजनीतिबाट मूलधारको राजनीतिमा आएका  हुन् । २०४२ सालमा महेन्द्र बहुमुखी क्याम्पस नेपालगन्ज बाँकेको अनेरास्ववियू पाँचौंको प्रारम्भिक कमिटी सदस्य भएका उनी २०४५ मा नेकपा (माले) मार्फत राजनीतिक दलमा आबद्ध भएका थिए । २०४६ मा नेकपा (माले) नेपालगन्जको नगर कमिटी सदस्य समेत बनेका थिए । 

२०४७ असारमा नेकपा (माले) दैलेख जिल्ला कार्यसमितिको संस्थापक सचिव बनेका उनी सोही वर्ष नेकपा एमालेको संस्थापक जिल्ला सचिव समेत बने । २०५२ देखि एमाले दैलेख जिल्ला कार्यसमितिको सचिवालय सदस्य बने । २०७१ मा निर्वाचित जिल्ला कार्यसमिति अध्यक्ष बने ।

२०७८ चैतमा भएको नेकपा एमाले दैलेखको सातौं जिल्ला अधिवेशनबाट शर्मा दोस्रो कार्यकालका लागि अध्यक्षमा निर्वाचित भए । भेरी अञ्चल समन्वय कमिटी सदस्य, एमाले कर्णाली प्रदेश कमिटी सदस्य हुँदै हाल कर्णाली प्रदेश कार्यसमितिको सहसचिव छन् ।

रवीन्द्रराज दैलेखमा एमालेका संस्थापक मात्र होइनन्, २०५४ सालमा नारायण नगरपालिकाका निर्वाचित मेयर पनि हुन् । उनी २०५५ मा नारायण क्याम्पसको संस्थापक अध्यक्ष समेत हुुन् । उनले २०७४ सालमा प्रतिनिधिसभा सदस्य हुँदा कानुन न्याय तथा मानव अधिकार समितिको सदस्य भएर काम गरेका थिए ।

अनुकूलता

लामो राजनीतिक पृष्ठभूमि, नगरपालिका प्रमुखदेखि प्रतिनिधिसभा सदस्यसम्मको अनुभव, जिल्लाको भूगोलको राम्रो ज्ञान तथा तल्लोतहका कार्यकर्ता–मतदातासम्म पहुँच भएका नेता हुन् ।

प्रतिकूलता

पटकपटक अवसर पाउँदा पनि प्रभावकारी काम गर्न नसकेको तथा अरुलाई मौका नदिई सधैं आफैं मात्र उम्मेदवार बनिरहेको भन्दै आफ्नै पार्टीका नेताहरूबाट हुने आलोचनालाई उनले चिर्नुपर्नेछ । राजनीतिमा पुस्तान्तरणलाई बल नपुर्‍याएको आरोप ।

व्यक्तिगत विवरण

नाम: रवीन्द्रराज शर्मा

जन्म : २०२१ असोज १० गते,

जन्मस्थान : दैलेख

स्थायी ठेगाना :  नारायण नगरपालिका रुपाखेत, दैलेख

शिक्षा: एसएलसी

२०५४ : नारायण नगरपालिका दैलेखको मेयर

२०७४ : प्रतिनिधिसभा सदस्य निर्वाचित

२०७९ : प्रतिनिधिसभा सदस्यमा पराजित

२०८२ : प्रतिनिधिसभा सदस्य उम्मेदवार

२०४२ : महेन्द्र बहुमुखी क्याम्पस नेपालगन्ज बाँकेको अनेरास्ववियु कमिटी सदस्य

२०४५  : नेकपा (माले)मा आबद्ध

२०४६ : नेकपा (माले) नेपालगन्जको नगर कमिटी सदस्य

२०४७ : नेकपा (माले) दैलेख जिल्ला कार्यसमितिको संस्थापक सचिव

२०५२ : एमाले दैलेख जिल्ला कार्यसमितिको सचिवालय सदस्य

२०५४ : नारायण नगरपालिका दैलेखको मेयर

२०७१ : दैलेख जिल्ला पार्टी अध्यक्ष

२०७८ : जिल्ला पार्टी अध्यक्ष (दोस्रो कार्यकाल)

२०७४ : प्रतिनिधिसभा सदस्य निर्वाचित

२०७९ : प्रतिनिधिसभा सदस्य पराजित

२०८२ : प्रतिनिधिसभा सदस्य उम्मेदवार