पर्यटनबाट राजनीतितर्फको यात्रा

पर्यटन क्षेत्रबाट राजनीतिमा प्रवेश गरेका गुरुङले अन्तर्राष्ट्रिय सहकार्यमार्फत वार्षिक ३५ लाख पर्यटक भित्र्याउने, आर्थिक रूपान्तरण र समृद्धि हासिल गर्ने एजेन्डा अघि सारेका छन्।

000

काठमाडौं क्षेत्र नम्बर ५ बाट उज्यालो नेपाल पार्टी (उनेपा) का तर्फबाट श्रीराम गुरुङ प्रतिनिधिसभा सदस्य पदका उम्मेदवार बनेका छन्। आगामी २१ फागुनमा हुने प्रतिनिधिसभा निर्वाचनका लागि उनले ६ माघमा निर्वाचन अधिकृतको कार्यालयमा उम्मेदवारी दर्ता गराएका हुन्।

गुरुङ संखुवासभा जिल्लाको खाँदबारी नगरपालिकाका स्थायी बासिन्दा हुन्। उनको जन्म २०३९ फागुन २८ गते संखुवासभामै भएको हो। उनका पिता लालबहादुर गुरुङ हुन्।

शैक्षिक रूपमा उनले पूर्वाञ्चल विश्वविद्यालयबाट स्नातकोत्तर (मास्टर्स) तहसम्मको अध्ययन पूरा गरेका छन्। व्यावसायिक रूपमा करिब १५ वर्षको अनुभव बोकेका गुरुङले मिडिया तथा हस्पिटालिटी म्यानेजमेन्ट क्षेत्रमा काम गरेका छन्।

उज्यालो नेपाल पार्टीले कुलमान घिसिङको नेतृत्वमा देशभर १२० निर्वाचन क्षेत्रमा उम्मेदवार खडा गरेको छ, जसमध्ये काठमाडौं–५ मा श्रीराम गुरुङलाई पार्टीको उम्मेदवार बनाइएको हो।

काठमाडौं–५ मा यसपटक बहुपक्षीय र कडा प्रतिस्पर्धा देखिएको छ। नेकपा एमालेका वरिष्ठ उपाध्यक्ष ईश्वर पोखरेल, नेपाली कांग्रेसका प्रदीप पौडेल, राष्ट्रिय प्रजातन्त्र पार्टीका कमल थापा, राष्ट्रिय स्वतन्त्र पार्टीकी सस्मित पोखरेललगायत चर्चित उम्मेदवारहरू पनि चुनावी मैदानमा छन् ।

उज्यालो नेपाल पार्टीका उम्मेदवारहरूले पर्यटन, ऊर्जा, विकास, सुशासन तथा नयाँ पुस्ताको नेतृत्वलाई मुख्य एजेन्डाका रूपमा अघि सारेका छन्।

निर्वाचन अभियानका क्रममा गुरुङले परम्परागत राजनीतिक दलहरूप्रति जनताको विश्वास घट्दै गएको उल्लेख गर्दै वैकल्पिक राजनीतिक विकल्प आवश्यक भएको धारणा राख्दै आएका छन्। यस क्षेत्रमा पुराना दलका ‘हेभिवेट’ नेताहरूमाथि नयाँ दल र नयाँ पुस्ताबाट चुनौती छ।

गुरुङ २०७९ सालको निर्वाचनमा काठमाडौं–५ बाट प्रतिनिधिसभा सदस्य पदमा स्वतन्त्र उम्मेदवारका रूपमा प्रतिस्पर्धा गरेका थिए। यसपटक भने उनी कुलमान घिसिङ नेतृत्वको उज्यालो नेपाल पार्टीबाट उम्मेदवारी दिएका हुन्। पर्यटन क्षेत्रबाट राजनीतिमा प्रवेश गरेका गुरुङले अन्तर्राष्ट्रिय सहकार्यमार्फत वार्षिक ३५ लाख पर्यटक भित्र्याउने, आर्थिक रूपान्तरण र समृद्धि हासिल गर्ने एजेन्डा अघि सारेका छन्।

अनुकूलता

• पर्यटन, मिडिया र हस्पिटालिटी क्षेत्रमा लामो समय काम गरेको अनुभव
• वैकल्पिक राजनीतिक छवि
• स्पष्ट आर्थिक एजेन्डा

प्रतिकूलता

• नयाँ पार्टी भएकाले ठूला दलजस्तो बलियो संगठन र सञ्जालको अभाव
• चर्चित उम्मेदवारसँग कडा प्रतिस्पर्धा
• राजनीतिक अनुभव सीमित