महोत्तरीको एकडारामा जन्मिएका सत्य नारायण शाह पेशाले इञ्जिनियर हुन् । भारतबाट मेकानिकल इञ्जिनियरिङमा स्नातक र बेलायतको ब्रिर्मिङ्घम युनिभर्सिटीबाट ‘म्यानुफ्याक्चरिङ इञ्जिनियरिङ’ र व्यस्थापनमा उनले स्तानकोत्तर तह उत्तीर्ण गरेका छन् ।
इञ्जिनियरकारुपमा झण्डै ३३ वर्ष सरकारी सेवा गरेका उनी विकास प्रशासन, सार्वजनिक खरिद प्रक्रिया, ठेक्का र योजना व्यवस्थापन क्षेत्रमा आफू विज्ञ भएको बताउँछन् । यिनै इञ्जिनियर शाहले देशमा राजनीतिकर्मी मात्रै जन्मिएको नेता नजन्मिएको भन्दै धनुषा क्षेत्र नं. ३ बाट प्रतिनिधिसभा सदस्यका लागि उम्मेदवारी दिएका छन् ।
‘वास्तविक नेताले आउने निर्वाचनभन्दा बढी देश र सन्ततिको भविष्यको चिन्तन गर्छ’, उनी भन्छन्, ‘तर अहिलेका राजनीतिकर्मीले आउने निर्वाचनमा आफ्नो कसरी जित सुनिश्चित गर्ने भन्ने मात्रै सोचे, सधैँ पद र शक्तिको लागि मात्र प्रयत्नशील रहे ।’ त्यसैले आफूले स्वतन्त्रबाट उम्मेदवारी दिएको उनी बताउँछन् ।
नेताहरुले झुठा बाचा र आश्वसन मात्रै दिएको बताउँदै आफूले काम गर्नका लागि चुनावी मैदानमा उत्रिएको शाह बताउँछन् । शाहसँग विश्व बैंक, अन्तर्राष्ट्रिय श्रम कार्यालय (आईएलओ), डिफिड, नेपाल आयल निगम, खाद्य उद्योग, हेटौंडा लगायतमा काम गरेको अनुभव पनि छ ।
शाहका अनुसार उनले उद्योगबाट हुने वायु प्रदुषण तथा रोकथाम, मिथिला संस्कृतिको विकासका लागि संगठनात्मक व्यवस्थापन, राजनीतिक शुद्धिकरणका लागि सामाजिक जागरण लगायतका विषयमा अध्ययन अनुसन्धानमूलक कार्यपत्र विभिन्न सन्दर्भमा प्रस्तुत गरेका छन् । उनी सन् २०१४ देखि २०१८ सम्म नेपाल इञ्जिनियरिङ काउन्सिलमा अध्यक्ष पनि रहे । मेकानिकल इञ्जिनियर समाजका पनि उनी पूर्वअध्यक्ष हुन् ।
२०२६ सालमा सरस्वती मावि, जनकपुरमा अध्ययरत रहँदा विभिन्न आन्दोलनहरुमा सक्रियरुपमा सहभागी भएका उनी २०२९ देखि ०३३ सालसम्म अमृत साइन्स कलेज, काठमाडौंमा अध्ययन गर्दा प्रजातान्त्रिक छात्र समूहमा सक्रियरुपमा सहभागी भएका थिए ।
उनले लायन्स क्लब अफ जनकपुरमा रहेर पनि विभिन्न सामाजिक कार्य गरेका छन् । आफू सभापतित्वमा संस्था हुँदा उनले स्वास्थ्य शिविर, भूकम्प पीडितका लागि राहत संकलन, भोला सिंह लायन्स मिथिला स्कुलको भवन निर्माण लगायतका कार्यमा भूमिका खेलेका थिए । यसका लागि राष्ट्रिय तथा अन्तर्राष्ट्रिय स्तरबाट सहयोग जुटाउने काम पनि उनैले गरेका थिए ।
२०४६ सालको जनआन्दोलनका बेला स्थापना भएको मानवअधिकार संरक्षण मञ्चका पनि उनी संस्थापक हुन् । मिथिला सांस्कृतिक केन्द्र, जनकपुरका पनि संस्थापक अध्यक्ष एवं संरक्षक शाहका लागि यो चुनावी प्रतिष्पर्धा त्यति सहज भने छैन । उनले स्वतन्त्रबाट उम्मेदवारी दर्ता भएका छन् । र, लामो समयदेखि बनेको संगठानिक संरचना भएका दलका उम्मेदवारहरुलाई उछिनेर जित निकाल्नु त्यति सहज पनि हुँदैन ।
तर, शाह चाहिँ आफू जितप्रति ढुक्क भएको बताउँछन् । उनी भन्छन्, ‘यो निर्वाचन भनेको समाजमा भएका विकृतिबाट मुक्ति पाउने समय पनि हो । त्यसका लागि असल नेतृत्व चुन्नुपर्छ । त्यसको विकल्प म नै हुँ भन्ने आममतदाताले बुझेका छन् ।’
धनुषा – ३ मा नेकपा एमालेबाट जुलीकुमारी महतो (महासेठ) र लोकतान्त्रिक समाजवादी पार्टी, नेपालबाट अनिलकुमार झा उम्मेदवार छन् ।