मेडिकल क्षेत्रबाट राजनीतिमा जम्दै

संसद् र सत्तामा बस्दा खेप्नु पर्ने आलोचनाबाट मुक्त छैनन्, उनी । पार्टीभित्रको असन्तुष्टि पनि उनका लागि चुनौती बन्न सक्छ ।

०००

गत निर्वाचनमा ललितपुर–३ मा डा. तोसिमा कार्की उम्मेदवार बन्दा कतिपयको टिप्पणी थियो– भोट काट्न आएकी उम्मेदवार । यस्तो प्रतिक्रियालाई गलत सावित गर्दै उनले चुनाव जितिन्, निकटतम् प्रतिद्वन्द्वीलाई दोब्बर भन्दा बढी मतले पछि पारेर ।

राष्ट्रिय स्वतन्त्र पार्टी (रास्वपा) बाट उठेकी कार्की ३१ हजार १३६ मत ल्याएर निर्वाचित हुँदा एमालेका अमृत खड्काको १२ हजार ९६३ र माओवादी केन्द्रकी पम्फा भुसालको ८ हजार ७६९ मत थियो ।

चुनाव जितेर उनी स्वास्थ्य राज्यमन्त्री बनिन् ।

ललितपुरकै नक्खुमा हुर्के–बढेकी उनले किष्ट मेडिकल कलेजबाट एमबीबीएस र काठमाडौं विश्वविद्यालयबाट एमएस (शल्य–चिकित्सामा स्नातकोत्तर) गरेकी हुन् । उनले नेपाल मेडिकल काउन्सिलमा कार्यकारी सदस्यको जिम्मेवारी पूरा गरिसकेकी थिइन् । राजनीतिमा आउनु अघि उनी पाटन स्वास्थ्य विज्ञान प्रतिष्ठानमा अध्यापन गर्थिन् ।

सार्वजनिक जीवनमा उनी सत्याग्रही डा. गोविन्द केसीको प्रतिबद्ध समर्थक र सहयोगी पनि हुन् । त्यसक्रममा उनले कानुनी लडाइँ समेत लडिन् । उनकै अगुवाइमा दायर मुद्दामा सर्वोच्च अदालतले चिकित्सा शिक्षा सुधारका विषयमा केही निर्देशनात्मक आदेश पनि दियो ।

डा. कार्कीले ललितपुर–३ बाट २१ फागुनमा हुने प्रतिनिधिसभा चुनावमा पुनः उम्मेदवारी दिएकी छन् । यसपटक उनका प्रतिस्पर्धी छन्, नेपाली कांग्रेसका जितेन्द्रकुमार श्रेष्ठ, नेकपा एमालेका सन्दन थापा मगर, नेपाली कम्युनिस्ट पार्टीका राजकाजी महर्जन र राष्ट्रिय प्रजातन्त्र पार्टीका सबिनकुमार खड्का ।

२०७९ को निर्वाचनको समानुपातिक तर्फको मतमा रास्वपामा नै अगाडि थियो । रास्वपाले १६ हजार ६५०, एमालेले १२ हजार २९७, राप्रपाले ८ हजार ७८९, कांग्रेसले ८ हजार २४७, माओवादीले ६ हजार ५३१ र नेपाल मजदुर किसान पार्टीले १ हजार ६५८ मत पाएको थियो ।

संसद् र सत्तामा बस्दा खेप्नु पर्ने आलोचनाबाट मुक्त छैनन्, उनी । पार्टीभित्रको असन्तुष्टि पनि उनका लागि चुनौती बन्न सक्छ ।

पार्टीको संगठन विस्तार, राजनीतिक अनुभव र प्रतिस्पर्धी गठबन्धन विनै मैदानमा आउनु डा. कार्कीका अनुकूलता हुन् ।