प्रभु साह राजनीतिक जीवनमा अप्रत्याशित निर्णय गरेर चर्चामा रहँदै आएका छन् । नेकपा (माओवादी)मा रहँदा डा. बाबुराम भट्टराई समूहका चल्दापुर्जा उनी पार्टी विभाजनको बेला संस्थापनमै रहे । नेकपा विभाजनको बेला फेरि प्रचण्डलाई छाडेर एमालेतिरै रहे ।
साहले नेकपा (एमाले) अध्यक्ष केपी शर्मा ओलीलाई जनता समाजवादी पार्टी (जसपा)सँग तालमेल गर्नै नहुने सुझाव दिएका थिए । मधेशमा एमालेलाई बलियो बनाएर त्यसको नेतृत्व आफूले गर्ने उनको उद्देश्य थियो ।
मधेशमा मिहिनेत गरेर एमाले प्रवेशको लहरै चलाएका उनी आफ्नो सुझाव नलागेपछि ओलीसँग झस्किए । एमालेभित्र माओवादीको हैसियत नहुने महसुस गरेपछि उनले निर्वाचनको मुखैमा ओलीलाई चकमा दिंदै रौतहट–३ मा स्वतन्त्र उम्मेदवारी दिए ।
रौतहटको मौलापुरमा जन्मिएका ५१ वर्षीय साहमा पछिल्लो मधेशका खास नेता बन्ने हुटहुटी छ, तर उनलाई जता डुले पनि सहज भएन । स्नातक तहसम्म अध्ययन गरेका उनी २०४६ पछि राजनीतिमा आकर्षित भएका हुन् ।
तत्कालीन नेकपा (माओवादी)मा लागेका साह २०५५ सालमा भूमिगत भए । माओवादीभित्र उनी चाँडै नै केन्द्रीय कमिटी सदस्य भए । २०६३ को अन्तरिम संसदमा सदस्य रहे । देश संघीय प्रणालीमा गएपछि माओवादी केन्द्रले आफ्नो प्रदेश–२ अध्यक्ष उनै साहलाई बनायो ।
उनी २०६४ र २०७० को दुवै संविधानसभामा रौतहट–३ बाट निर्वाचित भए । संविधानसभाबाट संघीय लोकतान्त्रिक गणतन्त्रको संविधान जारी भएपछिको पहिलो प्रतिनिधिसभा निर्वाचनमा पनि रौतहट–३ बाटै जितेर चुनावी खेलमा ‘ह्याट्रिक’ गरे ।
२०६८ र २०६९ मा क्रमशः कानुनमन्त्री र भूमिसुधार मन्त्री बनेका साहले २०७३ मा शहरी विकास मन्त्रालयको नेतृत्व पाए ।
चुनावी अंकगणित
गत स्थानीय निर्वाचनमा वडाअध्यक्षका उम्मेदवारहरूले प्राप्त गरेको दलगत रूपमा मतपरिणाम अनुसार रौतहट–३ मा एमाले सबभन्दा ठूलो दल हो । एमालेले २१ हजार ७२९, नेपाली कांग्रेसले १९ हजार २४१, नेकपा (एकीकृत समाजवादी)ले ११ हजार ७३६ र माओवादी केन्द्रले ११ हजार २७९ मत पाएको छ ।
त्यस्तै, जसपाले ९ हजार ४८३, जनमत पार्टीले १ हजार २९० र लोकतान्त्रिक समाजवादी पार्टी (लोसपा)ले १ हजार ९७ मत पाएको छ । रौतहट–३ मा स्वतन्त्र उम्मेदवारहरूले पनि २ हजार ९०० मत पाएका छन् ।
स्थानीय चुनावको जतिजा जे–जस्तो भए पनि प्रभु साहले रौतहट–३ मा पहिल्यै मैदान खाली पारेर स्वतन्त्र उम्मेदवारी दिएका हुन् । पराजयविहीन चौथो जितको प्रयासमा रहेका उनले सत्ता गठबन्धनको समर्थन लिंदै माओवादी केन्द्रका रवीन्द्र पटेलको उम्मेदवारी फिर्ता गराएका छन् । अब उनीसँग भिड्न जनमत पार्टीका रामेश्वरप्रसाद यादव मात्र चुनावी मैदानमा छन् ।
तेस्रो चुनावी प्रतिस्पर्धामा गठबन्धनको भर 
