अनुभवीलाई सागरको चुनौती

गुल्मीको सत्यवती गाउँपालिका–६, पिपलनेटाका सागर ढकाल पेशाले इन्जिनियर हुन् । २०४८ असार २८ मा जन्मिएका उनले राष्ट्रिय स्वतन्त्र पार्टी (रास्वपा) बाट उम्मेदवारी दिएका छन् ।

एउटा टेलिभिजन शोमा पूर्व प्रधानमन्त्री शेरबहादुर देउवालाई प्रश्न गरेर चर्चामा आएका ढकाल २०७९ मा डडेलधुराबाट प्रतिनिधिसभा सदस्यका उम्मेदवार थिए । त्यतिबेला देउवाकै निर्वाचन क्षेत्रबाट स्वतन्त्र उम्मेदवारी दिएका उनी १३ हजार ४२ मत सहित दोस्रो स्थानमा आएका थिए ।

ऊर्जा तथा जलस्रोत क्षेत्रमा १० वर्षभन्दा बढी काम गरेका ढकालले अक्सफोर्ड युनिभर्सिटीबाट एमएस्सी गरेका छन् ।

ढकाल रास्वपाका केन्द्रीय सदस्य हुन् । गुल्मी–१ मा ढकालसँगै नेकपा एमालेबाट प्रदीप ज्ञवाली, नेपाली कांग्रेसबाट डा. चन्द्र भण्डारी, नेपाली कम्युनिष्ट पार्टीबाट सुदर्शन बराल लगायतले उम्मेदवारी दिएका छन् ।

२०७९ मा यो क्षेत्रमा समानुपातिकतर्फ एमालेले २८ हजार ४५३, कांग्रेसले २३ हजार ४१३, रास्वपाले ८ हजार ११६ र माओवादीले ६ हजार २५७ मत प्राप्त गरेको थियो । प्रत्यक्षमा ३३ हजार ७४४ मत पाएर कांग्रेसका डा. चन्द्र भण्डारी निर्वाचित हुँदा रास्वपाका दामोदर भण्डारीले १ हजार ८८२ प्राप्त गरेका थिए । प्रत्यक्षमा तेस्रो स्थानमा आएको रास्वपाका उम्मेदवारले १ हजार ८८२ मत पाएका थिए ।