झिनो मतान्तरको स्मृति बोकेर पुनः चुनावी मैदानमा

विद्यार्थी जीवनदेखि नै राजनीतिमा सक्रिय यादव कांग्रेसको भातृ संगठन तरुण दलको केन्द्रीय अध्यक्षसमेत भइसकेका छन् । निरन्तर उतार–चढावका बाबजुद उनले राजनीतिमा आफ्नो उपस्थिति र प्रभाव कायम राख्दै आएका छन् ।
०००
प्रतिनिधिसभा निर्वाचनमा धनुषा क्षेत्र नं.-४ मा नेपाली कांग्रेसका उम्मेदवार महेन्द्र यादवलाई अनुभवी र संघर्षशील नेताका रूपमा चिनिन्छ ।

धनुषाको लक्ष्मीनिया गाउँपालिका–बनिगामा निवासी ६३ वर्षीय यादव कांग्रेसका निवर्तमान सहमहामन्त्री हुन् । उनी २०७० सालको दोस्रो संविधानसभामा समानुपातिक प्रणालीबाट सांसद निर्वाचित भई सरसफाइ तथा खानेपानी मन्त्रीको जिम्मेवारी सम्हालिसकेका छन् ।

विद्यार्थी जीवनदेखि नै राजनीतिमा सक्रिय यादव नेपाली कांग्रेसको भातृ संगठन तरुण दलको केन्द्रीय अध्यक्षसमेत भइसकेका छन् । निरन्तर उतार–चढावका बाबजुद उनले राजनीतिमा आफ्नो उपस्थिति र प्रभाव कायम राख्दै आएका छन् ।

२०७४ र २०७९ को प्रतिनिधिसभा निर्वाचनमा उनी एमाले नेता रघुवीर महासेठसँग पराजित भएका थिए । २०७९ को निर्वाचनमा पाँच दलीय गठबन्धनका उम्मेदवार बनेका यादव र एक्ला एमाले उम्मेदवार महासेठबीच कडा प्रतिस्पर्धा भएको थियो । उक्त निर्वाचनमा महासेठले ३२ हजार २३६ मत प्राप्त गरी विजयी हुँदा यादव ३२ हजार ११२ मतसहित १२४ मतको झिनो अन्तरले पराजित हुन पुगे ।

त्यसअघि २०७४ को निर्वाचनमा महासेठले २२ हजार ५३२ मत ल्याएर विजयी हुँदा यादवले १९ हजार ९९१ मत प्राप्त गरेका थिए, जसमा उनी २ हजार ५४१ मतले पराजित भए ।

पटक–पटकको पराजयका बाबजुद पनि यादव चुनावी राजनीतिबाट पछि नहटी निरन्तर सक्रिय छन् ।

ललितनारायण मिथिला विश्वविद्यालयबाट बीएस्सी उत्तीर्ण गरेका उनी कांग्रेसभित्र प्रभावशाली नेताका रूपमा मानिन्छन् । उनी कांग्रेसको देउवा पक्षका प्रभावशाली नेता हुन् ।