ह्याट्रिक गर्ने धुनमा एमालेका मधेश कमान्डर

२०७९ सालको प्रतिनिधिसभा निर्वाचनमा महासेठले धनुषा क्षेत्र नं. ४ बाट लगातार दोस्रो पटक जित निकालेका थिए। पाँचदलीय गठबन्धनका तर्फबाट नेपाली कांग्रेसका तत्कालीन सहमहामन्त्री महेन्द्र यादव उम्मेदवार हुँदाहुँदै पनि महासेठ एमालेबाट एक्लै विजयी भएका थिए।

 ००० ०००

नेकपा एमालेका उपमहासचिव रघुवीर महासेठ आगामी फागुन २१ गते हुने प्रतिनिधिसभा निर्वाचनमा धनुषा निर्वाचन क्षेत्र नं. ४ का उम्मेदवार हुन्। यसअघि यसै क्षेत्रबाट दुईपटक विजयी भइसकेका महासेठ तेस्रो पटक प्रतिनिधिसभा प्रवेशको प्रयासमा छन्। धनुषाको मिथिला बिहारी नगरपालिका–२ का स्थायी बासिन्दा महासेठ विद्यार्थी राजनीतिबाट उदाएका हुन्।

अनेरास्ववियु हुँदै एमालेको मूलधारको राजनीतिमा प्रवेश गरेका महासेठ पटक–पटक मन्त्री र उपप्रधानमन्त्रीसम्म भइसकेका छन्। गत मंसिरमा भएको एमालेको ११औँ महाधिवेशनबाट पुनः उपमहासचिवमा निर्वाचित हुनु उनको पार्टी जीवनको ‘ह्याट्रिक’ नै हो। उनी मधेशबाट एमालेका एक्ला पदाधिकारी हुन्। उनी मधेशमा एमालेका प्रभावशाली नेताका रूपमा स्थापित छन्।

महासेठको राजनीतिक उचाइसँगै उनको पारिवारिक र आर्थिक पृष्ठभूमिबारे पनि चर्चा हुने गरेको छ। उनी नेपालका धनाढ्य व्यवसायी उपेन्द्र महतोका बहिनीज्वाइँ हुन्। उनकी श्रीमती जुलीकुमारी महतो पनि एमालेकी प्रभावशाली नेतृ हुन्। आर्थिक सम्पन्नता र पार्टी अध्यक्ष केपी शर्मा ओलीसँगको निकटताका कारण महासेठ दम्पती पार्टीको शक्ति केन्द्रमा निरन्तर रहँदै आएको भन्ने टिप्पणी राजनीतिक वृत्तमा सुनिन्छ।

२०७४ सालको प्रतिनिधिसभा निर्वाचनमा मधेशका दुईवटा मात्र निर्वाचन क्षेत्रमा एमालेले प्रत्यक्ष जित निकालेको थियो, जसमा धनुषा क्षेत्र नं. ४ बाट महासेठ विजयी भएका थिए। सोही निर्वाचनमा उनकी श्रीमती जुली समानुपातिक सांसद बनिन्। ओली प्रधानमन्त्री बनेपछि महासेठ भौतिक पूर्वाधार तथा यातायातमन्त्री बने। यद्यपि केही विवाद र बदनामीका कारण २०७६ मंसिर ४ गतेको मन्त्रिपरिषद् पुनर्गठनमा उनी हटाइएका थिए। नेकपा विभाजनको सँघारमा ओलीसँग दूरी बढेपछि पनि २०७८ सालमा उनी उपप्रधान तथा परराष्ट्रमन्त्री बने। तर सर्वोच्च अदालतको परमादेशपछि सरकार परिवर्तन हुँदा दुई सातामै उनले पद गुमाउनुपर्‍यो।

२०७९ सालको प्रतिनिधिसभा निर्वाचनमा महासेठले धनुषा क्षेत्र नं. ४ बाट लगातार दोस्रो पटक जित निकाले। पाँचदलीय गठबन्धनका तर्फबाट नेपाली कांग्रेसका तत्कालीन सहमहामन्त्री महेन्द्र यादव उम्मेदवार हुँदाहुँदै पनि महासेठ एमालेबाट एक्लै विजयी भएका थिए। सोही निर्वाचनमा धनुषा क्षेत्र नं. ३ बाट जुलीकुमारी महतो प्रत्यक्ष निर्वाचित भएपछि महासेठको राजनीतिक शक्ति थप मजबुत बन्यो।

महासेठको राजनीतिक यात्रा उतार–चढावले भरिएको छ। २०५० सालमै उदयपुर सिमेन्ट कारखानाको कार्यकारी अध्यक्ष बनेका उनी २०६४ सालमा धनुषा–४ बाट संविधानसभा निर्वाचनमा लडे। तर सञ्जय साह ‘टकला’ सँग पराजित भए। २०६५ सालको उपनिर्वाचनमा धनुषा–५ बाट उनी पहिलोपटक प्रत्यक्ष निर्वाचित भए।

२०७० मा धनुषा–५ बाट पुनः हार बेहोरे। २०७३ मा महासेठ र जुली पार्टीमा केन्द्रीय सदस्य बने। एकीकृत नेकपामा स्थायी समिति सदस्य हुँदै उनी १०औँ महाधिवेशनबाट सचिव निर्वाचित भएका थिए। त्यसपछि ११औँ महाधिवेशनबाट उनी उपमहासचिव निर्वाचित भएका थिए।