महिला सशक्तीकरणको एजेन्डा लिएर संसदीय यात्रामा

नेपाली कांग्रेसकी नेतृ चन्द्रकला देवी यादव सिरहा निर्वाचन क्षेत्र नम्बर ४ बाट प्रतिनिधिसभा सदस्य उम्मेदवार बनेकी छन्। पार्टी संगठन, सामाजिक गतिविधि र जनसेवामा निरन्तर सक्रिय रहँदै आएकी उनी यसपटक राष्ट्रिय राजनीतिमा जनताको आवाज पुर्‍याउने लक्ष्यसहित मैदानमा उत्रिएकी हुन्।

वि.सं. २०३८ साल मंसिर ५ गते सिरहाको नरहा गाउँपालिका–१, नरहामा जन्मिएकी यादवले आइएसी तहसम्मको अध्ययन पूरा गरेकी छन्।

वि.सं. २०६४ सालमा नेपाली कांग्रेसको सदस्यता लिएर औपचारिक राजनीतिक यात्रामा प्रवेश गरेकी उनी त्यसयता पार्टीको सिद्धान्त, मूल्य र लोकतान्त्रिक अभ्यासको पक्षमा निरन्तर सक्रिय रहँदै आएकी छन्। विभिन्न राजनीतिक तथा सामाजिक गतिविधिमा सक्रिय सहभागितामार्फत उनले जिल्लामा आफ्नो छुट्टै पहिचान बनाएकी छन्।

वि.सं. २०७८ सालमा सम्पन्न नेपाली कांग्रेसको १४औँ महाधिवेशनमा उनी प्रतिनिधि सदस्यका रूपमा चयन भएकी थिइन्। त्यसैगरी, वि.सं. २०७९ सालमा नेपाली कांग्रेसको तर्फबाट विष्णुपुर गाउँपालिकाको उप–प्रमुख पदमा उम्मेदवारी दिएकी उनी झिनो मतान्तरले पराजित भएकी थिइन्।

हाल पनि पार्टीभित्र सक्रिय भूमिकामा रहँदै आएकी यादवले पार्टीको नीति, सिद्धान्त र जनताको आवाजलाई राष्ट्रिय स्तरमा प्रतिनिधित्व गर्ने उद्देश्यका साथ सिरहा निर्वाचन क्षेत्र नम्बर ४ बाट प्रतिनिधिसभा सदस्य पदका लागि उम्मेदवारी दर्ता गराएकी छन्।

महिला सशक्तीकरण, शिक्षा, स्वास्थ्य र स्थानीय विकासलाई प्राथमिक एजेन्डा बनाउँदै उनी मतदाताको विश्वास जित्ने प्रयासमा छन्।