डलर अर्बपतिको ‘सेकेण्ड इनिङ्स’ तयारी 

नेपालका एक मात्र डलर अर्बपति विनोद चौधरीका लागि यो निर्वाचन केवल सत्ताको निरन्तरता मात्र होइन, आफ्नो "राजनीतिक ब्रान्ड" जोगाउने ठूलो चुनौती पनि हो।

०००

नेपाली कांग्रेसको विशेष महाधिवेशनबाट केन्द्रीय सदस्य चयन भए, उद्यगोपति विनोद चौधरी । नेपालका एक मात्रै डलर अर्बपति चौधरीको कांग्रेस केन्द्रीय समितिमा यो दोस्रो ‘इनिङ्स’ हो ।

चौधरीको प्रत्यक्षतर्फको निर्वाचन प्रतिस्पर्धा पनि यो दोस्रो हो । २०६४ मा नेकपा (एमाले)को तर्फबाट समानुपातिक सभासद बनेका उनी २०७९ मा कांग्रेसबाट टिकट लिएर नवलपरासी–१ बाट विजयी भएका थिए ।

नेपाल उद्योग वाणिज्य महासंघ र उद्योग परिसंघको नेतृत्व गरिसकेका ७० वर्षीय चौधरीसँग दुई खर्ब (१.५ बिलियन डलर) रुपैयाँ सम्पत्ति रहेको विश्वका अर्बपतिहरूको सूची सार्वजनिक गर्ने फोर्ब्स म्यागजिनले उल्लेख गरेको थियो ।

चौधरी ग्रुप र सीजी कर्प ग्लोबलका अध्यक्ष चौधरी मातहत १६० कम्पनी छन् । १२३ वटा ब्रान्ड चौधरीको व्यवसायमा जोडिएका छन् । पाँच वटै महाद्वीपका २७ देशमा चौधरी ग्रुपको उपस्थिति छ । चाउचाउको विश्व बजारमा चौधरीको वाइ–वाइ ब्रान्डको २.६ प्रतिशत हिस्सा रहेको सीजी कर्प ग्लोबलको दाबी छ ।

उद्योग, व्यापार, पर्यटन, शिक्षा, मनोरञ्जन, वित्त, सञ्चार र निर्माण क्षेत्रमा लगानी गरेका चौधरीले नवलपुर (नवलपरासी पूर्व)मा शाश्वत धाम बनाएका छन् । उनको आत्मकथाः विनोद चौधरी विभिन्न भाषामा अनुवादित भएको छ ।

विगतको निर्वाचनको गणित र वर्तमान राजनीतिक परिदृश्यलाई हेर्दा चौधरीका लागि यसपटकको बाटो २०७९ को तुलनामा कठिन देखिन्छ।

पञ्चायतकालमा रानी ऐश्वर्य, अधिराजकुमार धीरेन्द्र शाह र सूर्यबहादुर थापासँग निकट सम्बन्ध बनाएका चौधरी २०४६ पछि एमालेसँग नजिकिएका थिए । तर, २०७४ को प्रतिनिधिसभा निर्वाचनअघि कांग्रेसमा प्रवेश गरे । त्योसँगै उनी मधेशीको कोटामा समानुपातिक सांसद र कांग्रेसको चौधौं महाधिवेशनबाट मधेशी कोटाबाटै केन्द्रीय सदस्य चुनिए ।

२०७९ मा चौधरी २९ हजार ५१५ मत ल्याएर निर्वाचित भएका थिए । त्यतिबेला उनका निकटतम प्रतिद्वन्द्वी हृदयेश त्रिपाठीले २२ हजार ३२८ मत पाए । चौधरीले माओवादी, एकीकृत समाजवादी, जनमोर्चाको साथ पाएका थिए भने त्रिपाठीलाई एमालेले समर्थन गरेको थियो ।

विनोद चौधरीको व्यक्तित्व 'फोर्ब्सको सूची' देखि 'नवलपरासीको खेतबारी' सम्म फैलिएको छ। पञ्चायतकालीन शक्ति केन्द्रदेखि एमाले हुँदै कांग्रेसको केन्द्रीय सदस्यसम्मको उनको यात्राले उनी शक्ति र सत्ताको गतिलाई राम्ररी बुझ्ने नेता हुन् भन्ने पुष्टि गर्छ।

गत निर्वाचनमा समानुपातिकतर्फ कांग्रेसले सबैभन्दा बढी २३ हजार ५१५ मत पाएको थियो । तर २०७९ मा जस्तो चौधरीलाई समर्थन गर्ने गठबन्धन छैन । त्यतिबेलाका माओवादी केन्द्र, एकीकृत समाजवादी मिलेर नेपाली कम्युनिष्ट पार्टी बनेको छ । यो पार्टीले सिन्धु जलेसा बुढाथोकीलाई अघि सारेको छ ।

त्यसो त चौधरीलाई असहयोग गरेका विक्रम खनालले कांग्रेस छाडेर रास्वपाबाट उम्मेदवारी दिएका छन् । त्रिपाठीले जसपा नेपालबाट उम्मेदवारी दिएका छन् । एमालेबाट रामप्रसाद पाण्डे चुनावी मैदानमा छन् ।