विद्यार्थी राजनीतिबाट उदाएका नेता

राष्ट्रिय स्वतन्त्र पार्टी (रास्वपा) का मधेश प्रदेश अध्यक्ष तथा इन्जिनियर तपेश्वर यादव प्रतिनिधिसभा सदस्यका लागि सिरहा निर्वाचन क्षेत्र नम्बर ४ बाट उम्मेदवार बनेका छन्।

सिरहाको नरहा गाउँमा जन्मिएका यादवको जन्म वि.सं. २०४९ साल मंसिर १५ गते भएको हो। इन्जिनियरिङ विषयमा स्नातक अध्ययन पूरा गरेका उनी विद्यार्थी जीवनदेखि नै समाजसेवा र राजनीतिमा सक्रिय रहँदै आएका छन्।

वि.सं. २०७५ सालमा ‘नेपाल इन्जिनियर एसोसिएसन अफ मधेश'को केन्द्रीय महासचिव बनेका यादव त्यसपछि लगातार दुई कार्यकालसम्म मधेश प्रदेश इन्जिनियर संगठनको नेतृत्वमा निर्वाचित हुँदै आएका छन्। साथै, पोखरास्थित तराई विद्यार्थी सेवा समाजका संस्थापक अध्यक्षका रूपमा उनले विद्यार्थी हकहित र सामाजिक सेवामा महत्वपूर्ण योगदान दिएका छन्।

व्यावसायिक रूपमा इन्जिनियर यादवले एमबीसी परियोजनामा प्रोजेक्ट अफिसरका रूपमा १४ जिल्लामा पुनर्निर्माण कार्यको जिम्मेवारी सम्हालेका थिए। यस अवधिमा उनले ३०० भन्दा बढी विद्यालय तथा २९२ वटा अस्पताल निर्माण तथा पुनर्निर्माण कार्यमा नेतृत्वदायी भूमिका निर्वाह गरेका छन्। साथै, उनले संयुक्त राष्ट्रसंघअन्तर्गत करिब दुई वर्ष काम गरेको अनुभव पनि राख्छन्।

स्थानीय तहमा समेत अनुभव बटुलेका यादवले मिर्चैया नगरपालिकामा करिब दुई वर्ष इन्जिनियरका रूपमा सेवा दिएका थिए। त्यसपछि उनले जागिरबाट राजीनामा दिएर रवि लामिछानेको नेतृत्वमा राष्ट्रिय स्वतन्त्र पार्टी स्थापना हुँदा सुरुवातकै चरणदेखि पार्टीमा आबद्ध भएका हुन्।

पार्टी स्थापनाकालदेखि नै सिरहा जिल्ला अध्यक्षको जिम्मेवारी सम्हाल्दै आएका यादव पहिलो निर्वाचनमा समानुपातिक प्रणालीतर्फ उम्मेदवार बनेर देशभर दोस्रो स्थान हासिल गर्न सफल भएका थिए। त्यसपछि जिल्ला अध्यक्ष हुँदै प्रदेश अध्यक्षमा निर्वाचित भएका उनी पछिल्ला तीन वर्षदेखि मधेश प्रदेशको नेतृत्व गर्दै पार्टी संगठन विस्तारमा सक्रिय छन्।

हाल प्रतिनिधिसभा निर्वाचनका लागि सिरहा–४ बाट उम्मेदवार बनेका यादव विकासमा प्राविधिक दक्षता, सुशासन, पारदर्शिता र जनमुखी राजनीति आफ्ना प्रमुख एजेन्डा रहेको बताउँछन्।