आफ्नै क्षेत्रमा फर्किएर उम्मेदवारी

जसपा नेपालका उपाध्यक्ष, पूर्वमन्त्री तथा तीन पटक सांसद भइसकेका राजकिशोर यादव २०८२ फागुन २१ गते हुने प्रतिनिधिसभा निर्वाचनमा सिरहा निर्वाचन क्षेत्र नम्बर ४ बाट उम्मेदवार बनेका छन्।

वि.सं. २०३० सालमा सिरहा जिल्लामा जन्मिएका यादवले स्नातक तहसम्मको अध्ययन गरेका छन्। वि.सं. २०४६ सालको ऐतिहासिक जनआन्दोलनमा सक्रिय सहभागिता जनाउँदै उनले आफ्नो राजनीतिक यात्रा सुरु गरेका हुन्। त्यसयता लोकतन्त्र, जनअधिकार, राष्ट्रियता र स्वाधीनताको पक्षमा उनी निरन्तर सक्रिय रहँदै आएका छन्।

यादव तीन पटक सांसद र दुई पटक मन्त्री भइसकेका अनुभवी नेता हुन्।

यसपटक पुनः क्षेत्र नम्बर ४ बाट उम्मेदवारी दिनुको निर्णय डर, भागाभागी वा जित–हारको अनुमानका आधारमा नभई सचेत र जिम्मेवार राजनीतिक रणनीतिका कारण भएको उनी स्पष्ट पार्छन्। २०७९ सालमा पार्टीको निर्णयअनुसार राष्ट्रिय नेताको भूमिकामा क्षेत्र नम्बर २ बाट उम्मेदवारी दिएको उल्लेख गर्दै उनी भन्छन्,'म पार्टीको सिपाही हुँ। मेरो वास्तविक आधार, संगठन र राजनीतिक यात्रा क्षेत्र नम्बर ४ मै छ।'

क्षेत्र नम्बर २ बाट जित्न नसक्ने डरले ४ मा फर्किएको भन्ने आरोपलाई उनले अस्वीकार गरेका छन्। उनका अनुसार क्षेत्र नम्बर २ मा पार्टीको संगठन अझै पनि बलियो छ। तर यो निर्वाचन केवल जित–हारको लडाइँ नभई 'देश जोगिने कि नजोगिने' निर्णायक संघर्ष भएकाले जिम्मेवारी बोधसहित आफ्नै क्षेत्रमा फर्किएको उनी बताउँछन्।

अघिल्लो निर्वाचनमा पार्टी व्यवस्थापनका कारण आफ्नै क्षेत्र छोड्नुपरे पनि यसपटक त्यो अवस्था नरहेको र क्षेत्रलाई अस्थिर बनाउने प्रयास बढेपछि आफू अग्रपंक्तिमा उभिएको उनले स्पष्ट पारेका छन्।

यस निर्वाचनलाई उनले नेपालको स्वाधीनता, राष्ट्रियता र अस्तित्वसँग जोडिएको ऐतिहासिक मोडका रूपमा व्याख्या गरेका छन्। बाह्य चलखेल र भित्री कारण देश कमजोर बनाउने प्रयास भइरहेको आरोप लगाउँदै त्यसविरुद्ध लड्न आफ्नै क्षेत्रबाट नेतृत्व लिएको उनी बताउँछन्।