शिक्षण जीवनबाट राजनीतिमा

सिरहाको गोलबजार नगरपालिका–६ का स्थायी बासिन्दा गंगाराम ठाकुर शिक्षक पेशाबाट सेवानिवृत्त भइसकेका अनुभवी नेता हुन्। उनी सिरहा निर्वाचन क्षेत्र नम्बर २ बाट श्रम सांस्कृतिक पार्टीको तर्फबाट प्रतिनिधिसभा सदस्यका लागि उम्मेदवारी दर्ता गराएका छन्।

वि.सं. २०३९ सालमा शिक्षक सेवामा प्रवेश गरेका ठाकुरले आफ्नो शिक्षण यात्रा सोलुखुम्बु जिल्लाको केदार निम्न माध्यमिक विद्यालयबाट सुरु गरेका थिए। करिब ८ वर्ष सो विद्यालयमा सेवा दिँदा उनले त्यसपछि सोलुखुम्बु जिल्लाभरिका विभिन्न विद्यालयहरूमा काम गर्दै कुल ४५ वर्ष शिक्षण पेशामा बिताए।

माओवादी जनयुद्धको समयमा काज सरुवामा परेर उनी २०६२ सालमा सोलुखुम्बुबाट सिरहाको गोलबजार नगरपालिका–२, जम्दहस्थित श्री सरस्वती माध्यमिक विद्यालयमा सरुवा भए। त्यसपछि पुनः शिक्षक ठाकुर सोलुखुम्बुको दुधकोशिका माविमा काममा लागे र २०८० सालमा शिक्षक सेवाबाट अवकाश पाए।

मनोनयनपछि अनलाइन सञ्चारकर्मीसँग कुरा गर्दै ठाकुरले ४५ वर्ष शिक्षक पेशामा काम गर्दा शिक्षित व्यक्तिहरू कहिलेकाहीँ अशिक्षित, शक्ति र पैसावालाको इशारामा चल्न बाध्य हुनुपर्ने गुनासो राखेका छन्। उनी भन्छन्,'कहिलेसम्म हामी शिक्षित भएर पनि अशिक्षितको इशारामा नाचिरहनुपर्ने? देश दिनप्रतिदिन बर्बादीतर्फ गइरहेको छ र मेरो जन्मभूमि मधेशको शिक्षा अवस्था कमजोर हुँदै गएको छ। किसानहरूको दुःख र पीडा देख्दा मन सिरिङ्ग हुन्थ्यो।'

शिक्षक सेवाबाट अवकाश पाएपछि समाज र देशको हितका लागि केही गर्न सकिन्छ कि भन्ने उद्देश्यले उनी यसपटक राजनीतिमा उत्रिएका हुन्। “समृद्ध नेपाल, सुखी नेपाली” भन्ने नारा भाषणमा मात्र सीमित नभई व्यवहारमा कार्यान्वयन हुनुपर्छ भन्नेमा ठाकुरले जोड दिएका छन्।