धरानका निवर्तमान मेयर हर्क साम्पाङले स्थापना गरेको श्रम संस्कृति पार्टी पहिलोपटक संसदीय निर्वाचनमा भाग लिँदैछ । जेनजी आन्दोलनपछि बदलिएको राजनीतिक परिस्थितिमा साम्पाङले आफू देशको प्रधानमन्त्री बन्ने घोषणा सहित नयाँ पार्टी स्थापना गरेका हुन् ।

मिश्रित निर्वाचन प्रणाली, संसदको बहुमतबाट निर्वाचित हुने प्रधानमन्त्री जस्ता संवैधानिक व्यवस्थाका कारण राजनीतिक दल खोल्नु परेको उनको तर्क छ । १६ कात्तिक २०८२ मा निर्वाचन आयोगमा दर्ता भएको यो पार्टीले हर्कवाद लाई आफ्नो राजनीतिक विचार र दर्शन भनेको छ ।

प्रकृति, संस्कृति र प्रविधिको सन्तुलन नै हर्कवाद भएको व्याख्या यो पार्टीले गरेको छ । हर्क साम्पाङले स्वतन्त्र उम्मेदवार बनेरै धरानको मेयर जिते यता चलाएको श्रम संस्कृतिका कारण यो पार्टीमा पछिल्लो समय जनआकर्षण देखिन्छ ।

विशेषगरी कोशी प्रदेशमा बलियो प्रभाव देखिएको यो पार्टीले प्रत्यक्ष निर्वाचित प्रधानमन्त्री, श्रम संस्कृतिमा आधारित विकास, विदेशी ऋण घटाउने नीति, शैक्षिक प्रणालीमा श्रम र व्यवसाय जोड्ने जस्ता एजेण्डा अगाडि सारेको छ ।

प्रकृतिको संरक्षण, रोजगार सिर्जना, कृषि र उद्योगमा समुदाय केन्द्रीत कार्यक्रम प्राथमिकतामा राख्ने यो पार्टीको लक्ष्य छ । श्रम संस्कृति पार्टीले प्रत्यक्ष तर्फ १६५ निर्वाचन क्षेत्र मध्ये १२० जना उम्मेदवार प्रतिश्पर्धामा उतारेको छ । समानुपातिक तर्फको बन्दसूचीमा ११० जनाकै नाम बुझाएको छ ।