नयाँ मतदाता रिझाउने अवसर

राष्ट्रिय स्वतन्त्र पार्टी (रास्वपा) ले केन्द्रीय सदस्य सोविता गौतमलाई चितवन–३ मा उम्मेदवार बनाएको छ । यसअघि काठमाडौं–२ बाट जितेकी गौतम आएपछि रास्वपाका कार्यकर्ता उत्साहित देखिन्छन् ।

२०५२ सालमा दोलखाको तामाकोशी गाउँपालिका जामुनेमा जन्मिएकी गौतमले कानुनमा स्नातक गरेकी छन् । अधिवक्ता गौतमसँग टेलिभिजन कार्यक्रम निर्माता, प्रस्तोता भएर काम गरेको अनुभव छ ।

२०७९ सालको निर्वाचनमा रास्वपाले चितवन–३ बाहेक सबै क्षेत्र जितेको थियो । त्यतिबेला जीता बराललाई चुनावमा उठाएको थियो । उनले १४ हजार ८४३ मत प्राप्त गरिन् ।

जबकी रास्वपाले समानुपातिकमा ल्याएको मत बरालको भन्दा झन्डै दोब्बर थियो । त्यतिबेला रास्वपाले २८ हजार ४०१ मत प्राप्त गरेको थियो ।

गौतमका लागि नेपाली कम्युनिस्ट पार्टीकी रेनु दाहाल चुनौती बन्ने देखिन्छ । दुई कार्यकाल भरतपुरको नगर प्रमुख बनेर काम गरेकी दाहालले आफूले गरेका कामको लामो सूचीसहित जनताको बीचमा पुगेकी छन् ।

२०७९ मा चितवन–३ मा कांग्रेस र एमालेका उम्मेदवार थिएनन् । एमाले समर्थित राप्रपाका विक्रम पाण्डे ३५ हजार ६० मत ल्याएर विर्नाचित हुँदा कांग्रेसको साथ पाएको माओवादीका भोजराज अधिकारीले २५ हजार ८२४ मत ल्याएका थिए ।

यसपटक एमालेबाट शंकर थपलिया र कांग्रेसबाट पुराना नेता टेकप्रसाद गुरूङ उम्मेदवार छन् । कांग्रेस–एमाले आफ्ना मत जोगाउन लाग्दा लोकप्रिय र माहोल भोटले उनको जित/हार निर्धारण गर्ने देखिन्छ ।