विद्यार्थी फाँटबाट संसदीय परीक्षामा

नेपाली कांग्रेसले पाल्पा–२ मा नेपाल विद्यार्थी संघ (नेविसं) मा लामो समय राजनीति गरेका हिमालदत्त श्रेष्ठलाई उम्मेदवार बनाएको छ । उनी २०३६ सालमा पाल्पाको जिल्ला सदरमुकाम तानसेन, नारायणस्थानमा जन्मिएका हुन् ।

२०५१ मा सेन माध्यमिक विद्यालय, तानसेनमा नेविसंको इकाई सभापति बनेका श्रेष्ठले २०५४ सालमा त्यहींबाट एसएलसी उत्तीर्ण गरे । त्रिभुवन विश्वविद्यालयबाट स्नातक गरेका उनले अध्ययन र राजनीतिलाई सँगसँगै अगाडि बढाए । त्रिभुवन बहुमुखी क्याम्पस, तानसेनमा नेविसंको इकाई सभापति हुँदै स्ववियु सभापति निर्वाचित भए ।

२०५९ मा राजाले ‘कू’ गरेपछि शुरु भएर २०६२/६३ सम्म चलेको जनआन्दोलनका क्रममा पक्राउ परेर १७ दिन हिरासतमा बसे ।

२०६२ मा मनोनीत केन्द्रीय सदस्य र २०६४ को चितवन महाधिवेशनबाट निर्वाचित नेविसंघ केन्द्रीय सदस्य बने । २०६४ मा नेपाली कांग्रेस पाल्पाको जिल्ला सदस्य र १३औं महाधिवेशनबाट महासमिति सदस्यमा निर्वाचित भए ।

२०७८ मा कांग्रेस पाल्पाको जिल्ला सभापतिमा निर्वाचित भए । श्रेष्ठ २०७९ सालमा सम्पन्न आमनिर्वाचनमा माओवादी केन्द्र, एकीकृत समाजवादी र जनमोर्चा सम्मिलित सत्ता गठबन्धनको संयोजक बनेका थिए ।

गत निर्वाचनमा पाल्पा–२ मा कांग्रेसको आफ्नै उम्मेदवार थिएन । कांग्रेस सहितको गठबन्धनको तर्फबाट उठेका एकीकृत समाजवादीका सोमप्रसाद पाण्डेयलाई एमालेका ठाकुर गैरेले पराजित गरेका थिए । गैरे र पाण्डेय दुवैले यसपटक पनि उम्मेदवारी दिएका छन् । रास्वपाबाट माधवबहादुर थापा, राप्रपाबाट डुलबहादुर कुँवर, राष्ट्रिय जनमोर्चाबाट बलबहादुर दर्लामी उठेका छन् ।

२०७९ को निर्वाचनमा आफैंले सघाएका नेपाली कम्युनिष्ट पार्टीका पाण्डेय, अघिल्लो पटकका विजेता गैरे लगायतलाई पन्छाएर जित निकाल्न सक्छन् कि सक्दैनन् थाहा पाउन निर्वाचन परिणाम कुर्नै पर्छ ।

प्रस्तुति: कमल अधिकारी