पर्यटन अभियन्ताको सांसद बन्ने दौड

अरू पार्टीभन्दा रास्वपा फरक रहेकाले मतदाताले विश्वास र भरोसा गरिरहेका उनको दाबी छ ।

०००

उदयपुरको कटारी नगरपालिका-७ मर्जेतपुरका स्थानीय हुन् सूर्यबहादुर तामाङ । ४१ वर्षीय तामाङलाई उदयपुर निर्वाचन क्षेत्र नम्बर-२ बाट राष्ट्रिय स्वतन्त्र पार्टी (रास्वपा) ले उम्मेदवार बनाएको छ ।

रास्वपा उदयपुरका सचिव समेत रहेका तामाङ पुराना दलबाट विकास सम्भव नभएको भन्दै राजनीतिमा आउनु परेको बताउँछन् ।

गढीकोट पर्यटन विकासका अभियन्ता समेत रहेका तामाङ २०७९ सालदेखि रास्वापाको राजनीति सक्रिय छन् ।

१२ कक्षासम्म उत्तीर्ण गरेका तामाङ भ्रष्टाचार, बेथितिले सीमा नाघेपछि नयाँ पुस्ता राजनीतिमा आउने क्रममा आफू पनि सक्रिय भएको बताउँछन् ।

युवा  माझ बढी लोकप्रिय रहेका मिजासिलो स्वाभावका तामाङ पुराना दलले यस क्षेत्रमा पटक-पटक जितेर गए पनि विकास गर्न नसकेको आरोप लगाउँछन् ।

पुराना नेताहरूले जहिले पनि जनतालाई भोट बैंकको रूपमा मात्रै प्रयोग गरेको उनको आरोप छ ।

अरू पार्टीभन्दा रास्वपा फरक रहेकाले मतदाताले विश्वास र भरोसा गरिरहेका उनको दाबी छ ।

२०७९ सालको प्रतिनिधिसभा सदस्य निर्वाचनमा रास्वपाका अनिल श्रेष्ठ उमेद्वार थिए । श्रेष्ठले ९ सय १० र समानुपातिक तर्फ रास्वपाले ३ हजार ८०६ मत पाएको थियो ।

यो चुनावमा तामाङसँगै नेकपा एमालेका अम्बरबहादुर रायमाझी, नेपाली कांग्रेसका रामकुमार राई, नेपाली कम्युनिस्ट पार्टी (नेकपा) का सुरेशकुमार राई लगायत प्रतिस्पर्धामा छन् ।

प्रस्तुति : अभिमन्यू लामिछाने