अधुरा काम पूरा गर्ने लक्ष्यका साथ चुनावी मैदानमा

विगतमा गरेको कामलाई निरन्तरता दिन र अधुरा काम पूरा गर्न आफू उम्मेदवार बनेको राई बताउँछन् । 

०००

उदयपुरको क्षेत्र नम्बर-२ बाट नेपाली कम्युनिस्ट पार्टी (नेकपा) ले २१ फागुनमा हुने प्रतिनिधिसभा सदस्य निर्वाचनमा सुरेशकुमार राईलाई उम्मेदवार बनाएको छ ।

२०६४ सालको पहिलो संविधानसभा निर्वाचनमा उनी पार्टीको चुनावी कमान्डर थिए । २०७० सालको दोस्रो संविधानसभा निर्वाचनमा भने उनी उदयपुर क्षेत्र नं.–२ बाट चुनाव लडे । तर उनी पराजित भए । 

२०७४ सालको प्रतिनिधिसभा सदस्य निर्वाचनमा भने यही क्षेत्रबाट उनले जित निकाले । २२ हजार ५५१ मत ल्याएर चुनाव जित्दा नेपाली कांग्रेसका नारायण कार्कीले १५ हजार ४५५ मत पाएका थिए । त्यसबेला उनी संसद्‍को शिक्षा स्वास्थ्य र खेलकुद समितिका सदस्य, मेडिकल शिक्षा नियमन अनुगमन समिति संयोजक भएर काम गरे ।

२०७९ सालको निर्वाचनमा भने गठबन्धनबाट तत्कालीन एकीकृत समाजवादीका उपमहासचिव जगन्नाथ खतिवडा उमेद्वार बनेपछि राई उम्मेदवार बन्न पाएका थिएनन् ।

२०४९ सालदेखि खम्बुवान मुक्ति मोर्चाबाट राजनीतिक यात्रा सुरु गरेका उनी माओवादी पार्टीसँग जोडिएर निरन्तर राजनीतिमा कृयाशील छन् ।

२०५९ सालमा माओवादीको केन्द्रीय सदस्य बनेका राई स्थायी कमिटी सदस्य हुँदै हाल पार्टी एकीकरण पश्चात बनेको नेकपाका केन्द्रीय सदस्य छन् ।

स्नातकसम्मको अध्ययन पूरा गरेका ५० वर्षीय राईले आफ्नो कार्यकालमा गरेको राम्रो कामको मूल्यांकन गरेर जनताले मत दिने विश्वास व्यक्त गर्छन् ।

विगतमा गरेको कामलाई निरन्तरता दिन र अधुरा काम पूरा गर्न आफू उम्मेदवार बनेको राई बताउँछन् ।