हारको बदला लिन युवा मतदाता रिझाउने चुनौती

गैर-कम्युनिष्ट मत (कांग्रेस, रास्वपा र राप्रपा) बीच विभाजन हुनु नै पोखरेलका लागि सबैभन्दा ठूलो अनुकूलता हो। यदि उनले एमालेको 'कोर' मतलाई सुरक्षित राख्न सकेमा परिणाम उल्ट्याउन सक्छन्।

‍‍‍०००

२० माघ २०१० मा ओखलढुंगामा जन्मिएका ईश्वर पोखरेल अहिले टोखा, काठमाडौंका स्थायी बासिन्दा हुन् । 

स्नातक तहसम्मको अध्ययन पूरा गरेका उनी २०२४ देखि राजनीतिमा छन् । उनले २०२७ सालमा १७ वर्षकै उमेरमा नेपाल कम्युनिस्ट पार्टी (पूर्व कोशी प्रान्तीय कमिटी)को सदस्यता पाएका थिए ।

२०३० सालबाट भूमिगत राजनीति सुरु गरेका पोखरेल २०३५ मा नेकपा (माले)को संस्थापक केन्द्रीय सदस्य बने । माले र नेकपा (मार्क्सवादी) मिलेर २०४७ मा बनेको नेकपा (एमाले)मा उनी पोलिटब्यूरो र स्थायी समिति सदस्य भए । उनी २०६५ र २०७० सालको पार्टी महाधिवेशनबाट महासचिवमा निर्वाचित भए ।  

२०५१ सालमा एमालेको अल्पमतको सरकार बन्दा प्रधानमन्त्री मनमोहन अधिकारीको प्रमुख राजनीतिक सल्लाहकारको भूमिका निभाएका पोखरेलले राजनीतिक जीवनमा १५ वर्ष भूमिगत र पटक–पटक गरी दुई वर्ष जेल जीवन बिताए ।  

३ जेठ २०७५ एमाले र नेकपा (माओवादी केन्द्र) मिलेर बनेको नेपाल कम्युनिस्ट पार्टी (नेकपा) को केन्द्रीय सचिवालय सदस्य पोखरेल पार्टी विभाजनपछि चितवनमा भएको एमालेको १०औं महाधिवेशनबाट वरिष्ठ उपाध्यक्षमा निर्वाचित भए ।

पोखरेलको संसदीय यात्रा २०५४ मा राष्ट्रिय सभा सदस्यको रूपमा भएको थियो । २०५६ सालको संसदीय निर्वाचनमा उनी काठमाडौं–३ बाट निर्वाचित भए । उनी मन्त्री भने २०६१ मा मात्र बने, नेपाली कांग्रेसका शेरबहादुर देउवा नेतृत्वको सरकारमा उद्योग, वाणिज्य तथा आपूर्ति मन्त्री ।

त्यसपछि उनी २०६९ जेठमा १३ दिन उपप्रधानसहित उद्योग वाणिज्य तथा आपूर्तिमन्त्री बने । 

२०७४ को निर्वाचनमा पोखरेल काठमाडौं–५ बाट प्रतिनिधिसभा सदस्यमा विजयी भएपछि २०७४ फागुनमा उपप्रधान एवं रक्षामन्त्री भए, २०७८ असारसम्म ।

१५ वर्ष भूमिगत र दुई वर्ष जेल जीवन बिताएका पोखरेल यसपटक पार्टीभित्रको 'विद्रोही' छवि र केपी ओलीसँगको चुनावी प्रतिस्पर्धाको रापसहित मैदानमा उत्रिएका छन्।

पोखरेलका ‘माघ १९’ र ‘पूर्वको रातो तारा’ पुस्तक प्रकाशित छन् ।

एमालेको बलियो संगठन भएको र २०७४ सालमा चुनाव जितेपनि काठमाडौं–५ का मतदाताले पोखरेललाई विजयी गराएनन् । झन्डै ५ हजार मतान्तरले कांग्रेस नेता प्रदीप पौडेलले बाजी मारे ।  

 पार्टीभित्र सधैं संस्थापन बनेर नेतृत्व रिझाउँदै आएका पोखरेल यसपटक विद्रोही कित्तामा उभिए र केपी शर्मा ओलीसँग अध्यक्षमा पराजित भए । उनी यसपटक यही विद्रोही छवि बोकेर चुनावी मैदानमा छन् । विगतको ‘भर्चुअल पर्सेप्सन’ केही बदलेका पोखरेल यसपटक कांग्रेसका प्रदीप पौडेल, राष्ट्रिय स्वतन्त्र पार्टीका सस्मित पोखरेल, राप्रपाका कमल थापा, उज्यालो नेपालका श्री गुरुङ लगायतका उम्मेदवारसँग हुँदैछ ।  

पोखरेललाई युवा मतदाता (जेनजी) रिझाउनु र कांग्रेस, रास्वपा तथा राप्रपाका बलिया उम्मेदवारहरूलाई पन्छाउनु मुख्य चुनौती हुनेछ।

जेनजी आन्दोलनपछि निर्वाचनमा पोखरेलका लागि पार्टीको छवि बोकेर युवा मतदाता रिझाउनु चुनौतीपूर्ण काम हुनेछ । तर गैरकम्युनिस्ट मत विभाजित हुने र कम्युनिस्ट मत जोगाउने खेल राम्ररी खेल्न सक्दा केही अनुकूलता सिर्जना गर्न सक्छन् । 

पोखरेलले हारको बदला लिन एमालेको पुरानो मत छरिन नदिई त्यसमा नयाँ मत जोड्नुपर्ने हुन्छ । पार्टी–संगठनको शक्ति र काठमाडौं–५ का जनतासँग चुनावअघिको उनको सम्पर्क–सम्बन्ध चाहिं सबल पक्ष छँदैछ ।