युवा पुस्ताको प्रतिनिधित्व गर्ने अवसर पर्खिरहेकी कल्पना

दुई दशकको संगठनात्मक अनुभव बोकेकी युवा नेतृ कल्पना राईलाई सोलुखुम्बुमा एमालेले पुस्तान्तरणको प्रतीकका रूपमा अघि सारेको छ ।

०००

आसन्न प्रतिनिधिसभा निर्वाचनमा सोलुखुम्बुबाट उम्मेदवार बनेकी कल्पना राईलाई नेकपा एमालेका नेताहरूले प्रतिष्ठाको विषयका रूपमा लिएका छन् । पुरुष उम्मेदवारहरूको भिडमा महिला हुनु मात्र होइन, ४० वर्षमुनिको युवा उम्मेदवार हुनुका कारण पनि एमालेले उनको उम्मेदवारीलाई विशेष महत्व दिएको देखिन्छ ।

२०४५ कात्तिक १६ गते सोलुखुम्बुको सोताङ गाउँपालिका-५, गोर्खिममा जन्मिएकी राईलाई उम्मेदवार बनाएर एमालेले पार्टी युवा पुस्ताको पक्षमा रहेको सन्देश दिन खोजेको स्पष्ट देखिन्छ । प्रचार सामग्रीहरूमा समेत सो उद्देश्य झल्किन्छ ।

तर, उनी केवल युवा भएकै कारण उम्मेदवार बनेकी भने होइनन् । एमालेमा राईको राजनीतिक अनुभव दुई दशकभन्दा लामो छ । उनको राजनीतिक यात्रा २०५८ सालमा अनेरास्ववियुमा आबद्ध भएपछि सुरु भएको हो ।

वीरेन्द्र ज्योति माध्यमिक विद्यालयको प्रारम्भिक कमिटी अध्यक्ष हुँदै उनी सक्रिय राजनीतिमा प्रवेश गरिन् र क्रमशः संगठन निर्माण तथा नेतृत्व क्षमताको विकास गर्दै अघि बढिन् ।

२०६१ सालमा अनेरास्ववियु सोलुखुम्बुको जिल्ला सचिव बनेकी राई २०६३ सालमा तत्कालीन माथिल्लो सगरमाथा अञ्चल सचिव र २०६४ सालमा अनेरास्ववियुको केन्द्रीय सदस्य बनिन् । २०६५ सालमा उनी नेकपा एमाले सोलुखुम्बुको जिल्ला सदस्य बनिन् ।

२०६६ देखि २०८० सालसम्म जिल्ला सचिवालय सदस्यको जिम्मेवारी सम्हालिन् र हाल उनी एमाले सोलुखुम्बुको जिल्ला सचिवको रूपमा कार्यरत छिन् ।

पार्टी संगठनसँगै उनले विभिन्न राजकीय जिम्मेवारी पनि निर्वाह गरिन् । २०६५ सालमा दुर्गम क्षेत्र विकास समितिको सदस्य तथा २०७० सालमा तत्कालीन सुकुम्बासी समस्या समाधान आयोगको सदस्यका रूपमा उनले काम गरिन् ।

२०७४ सालको स्थानीय तह निर्वाचनमा उनी सोलुदूधकुण्ड नगरपालिकाको उपमेयरमा निर्वाचित भएकी थिइन् । मेयर नाम्गेल जाङ्बु शेर्पाले २ हजार ७५१ मत प्राप्त गर्दा राईले उपमेयरमा २ हजार ७५० मत ल्याएर उल्लेखनीय लोकप्रियता हासिल गरेकी थिइन् ।

पार्टी संगठन र राजकीय भूमिकासँगै राईले शैक्षिक योग्यता पनि सुदृढ बनाएकी छन् । उनले शिक्षाशास्त्रमा स्नातकोत्तर तथा कानुन विषयमा स्नातक अध्ययन पूरा गरेकी छन् ।