बलबहादुर पछि हट्दा पाएको अवसर
बलबहादुर केसीले चुनाव नलड्ने घोषणा गरेपछि उनले अन्य उम्मेदवारलाई पछि पार्दै टिकट हात पारेका हुन् ।
०००
२०२० सालमा सोलुखुम्बुको नेचासल्यान गाउँपालिका-१ मा जन्मिएका हुन् प्रकाशसिंह कार्की । उनै कार्कीलाई नेपाली कांग्रेसले २१ फागुनमा हुने प्रतिनिधिसभा सदस्य निर्वाचनमा सोलुखुम्बुबाट उम्मेदवार बनाएको छ ।
उच्च माध्यमिक तहसम्म अध्ययन गरेका कार्कीले राजनीति र समाजसेवालाई सँगसँगै अघि बढाएका छन् । २०३५ सालमा नेविसंघबाट राजनीति सुरुवात गरेका उनी २०४७ सालमा भएको कांग्रेसको चाक्सीबारी सम्मेलनमा सोलुबाट प्रतिनिधि बनेर कांग्रेसको सोलुखुम्बु-काठमाण्डु सम्पर्क समितिको महसचिव भए । त्यसपछि पार्टी जिल्ला सदस्य र महाधिवेशन प्रतिनिधि भएर उनले काम गरे ।
राजनीतिसँगै सामाजिक क्षेत्रमा पनि उनको नाम सँगै आउँछ । उनी पर्यटन व्यवसायमा आवद्ध हुनुका साथै नेपाल फ्रेट फर्वार्ड एसोसिएसनका अध्यक्ष तथा नेपाल उद्योग वाणिज्य महासंघ कार्यकारिणी समिति सदस्य समेत भएका थिए ।
२०७४ सालमा प्रदेश सभा सदस्यको उम्मेदवार बनेका उनी वाम गठबन्धनका उम्मेदवारसँग पराजित भए । २०८२ सालमा पार्टीका सिनियर नेताहरूलाई पछि पार्दै टिकट हात पारेका उनी प्रतिनिधिसभा सदस्य भएर रेकर्ड कायम गर्ने प्रयासमा छन् । पार्टीमा उनी गगन थापा निकट मानिन्छन् ।
जिल्लाबाट टिकटका लागि चौथो नम्बरमा सिफारिस भएका उनलाई पार्टीको विशेष महाधिवेशनबाट निर्वाचित केन्द्रीय नेतृत्वले टिकट दिएको हो ।
यसपटक बलबहादुर केसीलाई पहिलो, आङगेलु शेर्पालाई दोस्रो र विनोद बस्नेतलाई तेस्रो नम्बरमा सिफारिस गरिएको थियो । बलबहादुर केसीले चुनाव नलड्ने घोषणा गरेपछि उनले अन्य उम्मेदवारलाई पछि पार्दै टिकट हात पारेका हुन् ।
प्रतिनिधिसभाको एक मात्र निर्वाचन क्षेत्र रहेको सोलुखुम्बुमा उनको सबैभन्दा सबल पक्ष भनेको मुख्य प्रतिस्पर्धी एउटै समुदायका हुनु हो । झन्डै ३५ प्रतिशत खसआर्य रहेको यो क्षेत्रमा मुख्य दलहरूमा उनी यो समुदायको एक्ला उम्मेदवार हुन् । तर पार्टीभित्र रहेको अन्तरसंघर्ष व्यवस्थापन उनका निम्ति पहिलो सर्त देखिन्छ ।
Battleground Analysis
अनुकूलता
- लामो राजनीतिक तथा संगठनात्मक अनुभव ।
- सामाजिक तथा व्यावसायिक पहिचान ।
- समुदायगत अनुकूलता ।
प्रतिकूलता
- अघिल्लो निर्वाचनमा पराजित भएकाले मतदाताको पुनः विश्वास जित्नु चुनौतीपूर्ण हुन सक्छ।
- पार्टीभित्रको अन्तरसंघर्ष व्यवस्थापन । किनकि उनी विशेष महाधिवेशन पक्षधर भएकाले टिकट पाएका हुन् ।
- बलिया प्रतिस्पर्धा । एक मात्र निर्वाचन क्षेत्र रहेको सोलुखुम्बुमा प्रतिश्पर्धी दलहरू पनि बलिया छन् ।
प्रकाश सिंह कार्कीको प्रोफाइल पढेर तपाईंलाई कस्तो लाग्यो ?
