जित जोगाउने जिम्मेवारी

आचार्य २०७९ मा नेपाली कांग्रेसका ज्ञानबहादुर गाहालाई पराजित गर्दै प्रतिनिधिसभा सदस्यमा निर्वाचित भएका थिए । 

०००

नेकपा (एमाले)ले पाल्पा–१ मा नारायणप्रसाद आचार्यलाई उम्मेदवार बनाएको छ । २०२६ सालमा पूर्वखोला गाउँपालिका–३, रिङ्नेरह तल्लाफाँटमा जन्मिएका उनी स्थानीय उद्बुद्ध माध्यमिक विद्यालयमा कक्षा ७ मा पढ्ने बेलामा अनेरास्ववियूको प्रारम्भिक कमिटीमा बसेका थिए ।

२०४३ सालमा जनपक्षीय उम्मेदवार दयाराज बस्यालको प्रचारप्रसारमा खटिए । २०४७ मा प्रजातान्त्रिक राष्ट्रिय युवा संघमा संगठित भएका उनी २०४८ को आमनिर्वाचनमा पार्टीको प्रचारप्रसारमा सक्रिय भए । २०५४ को स्थानीय निकाय निर्वाचनमा रिङ्नेरह गाउँ विकास समिति (गाविस)को अध्यक्ष निर्वाचित भए ।

२०५५ सालदेखि एमाले पाल्पा जिल्ला कमिटी सदस्य, उपाध्यक्ष हुँदै २०७३ देखि २०७८ सम्म जिल्ला अध्यक्ष थिए । २०७४ सालमा एमाले लुम्बिनी प्रदेश सचिवालय सदस्य बने ।  २०७४ को निर्वाचनमा पाल्पा–१ (२) बाट लुम्बिनी प्रदेश सभा सदस्यमा निर्वाचित भए । प्रदेश सभामा भौतिक पूर्वाधार विकास समिति र प्रदेश मामिला तथा कानून समितिमा बसेर काम गरे ।

२०७९ मा नेपाली कांग्रेसका ज्ञानबहादुर गाहालाई पराजित गर्दै प्रतिनिधिसभा सदस्य निर्वाचित भए । आचार्यले ३१ हजार १०३ र गाहाले २० हजार २५६ मत पाएका थिए ।

समानुपातिकतर्फको मतमा पनि एमालेले कांग्रेसलाई १० हजार भन्दा बढीले उछिनेको थियो । एमालेले २८ हजार ९१० पाउँदा कांग्रेसले १८ हजार ७५५, रास्वपाले ४ हजार २८५, मंगोल नेशनल अर्गनाइजेसनले १ हजार ७९७, माओवादी केन्द्रले १ हजार ७६७ र नेकपा (एकीकृत समाजवादी)ले ५८६ भोट ल्याएको थियो ।

आचार्यले आफ्नो अघिल्लो मत सुरक्षित मात्र राख्न सके भने यसपटकको प्रतिस्पर्धामा उनी केही सहज देखिनेछन् । अन्यथा, सत्ताविरोधी मत उनका लागि भारी पर्न सक्छ ।

कांग्रेसले सन्दिप राना, नेपाली कम्युनिष्ट पार्टीले हुमबहादुर सुनारी मगर, रास्वपाले विमल पन्त, राप्रपाले बृहस्पति अर्याल, राष्ट्रिय जनमोर्चाले नरमती सिंजाली र मंगोल नेशनलले सलन चिदीलाई उम्मेदवार बनाएको छ । गत निर्वाचनको मत जोगाउँदै केही मत थप्न सक्ने हो भने आचार्यलाई जित निकाल्न असहज देखिंदैन ।