नेपाली कांग्रेसका अतहर कमाल मुसलमान नेपालको संसदीय राजनीतिमा स्थापित र अनुभवी व्यक्तित्वका रूपमा परिचित छन् । सामाजिक सद्भाव, धार्मिक सहिष्णुता र क्षेत्रीय विकासलाई आफ्नो राजनीतिक प्राथमिकता बनाउँदै आएका उनी कपिलवस्तु जिल्लाबाट उदाएका प्रभावशाली नेतामध्ये एक मानिन्छन् । संगठन निर्माणदेखि संसदीय अभ्याससम्मको लामो यात्राले उनलाई राष्ट्रिय राजनीतिमा पहिचान दिलाएको छ ।

वाँणगंगा नगरपालिका–११ बनकटुवा निवासी अतहर कमालको जन्म २०२७ साल वैशाख २८ गते कपिलवस्तुमै भएको हो ।

विज्ञान विषयमा आई.एससी. सम्मको अध्ययन पूरा गरेका उनी विद्यार्थी जीवनदेखि नै सामाजिक र राजनीतिक गतिविधिमा संलग्न थिए ।

उनको राजनीतिक सक्रियता भने २०४१ सालमा नेपाली कांग्रेस निकट नेपाल विद्यार्थी संघमार्फत सुरु भएको हो । विद्यार्थी राजनीतिबाट संगठनात्मक जिम्मेवारी सम्हाल्दै उनी २०४८ सालको नेपाली कांग्रेस महाधिवेशनबाट महासमिति सदस्य निर्वाचित भएका थिए । त्यसपछि जिल्ला सदस्य हुँदै पार्टीको केन्द्रीय कार्यसमिति सदस्यसम्मको जिम्मेवारीमा पुगे ।

२०७० सालको दोस्रो संविधानसभा निर्वाचन उनको राजनीतिक जीवनको महत्वपूर्ण मोड मानिन्छ । आफ्नै पार्टीका आधिकारिक उम्मेदवारविरुद्ध स्वतन्त्र उम्मेदवारका रूपमा कपिलवस्तु क्षेत्र नम्बर २ बाट प्रतिस्पर्धा गर्दै उनी निर्वाचित भए । उक्त निर्वाचनमा नेपाली कांग्रेसका प्रभावशाली नेता दीपकुमार उपाध्यायलाई पराजित गर्नु उनको राजनीतिक साहस र जनाधारको प्रमाणका रूपमा हेरिन्छ । चुनावमा बागी बनेर निर्वाचित भए पनि उनी पुन: नेपाली कांग्रेसमै पार्टीकै राजनीतिमा सक्रिय भएका थिए ।

२०७४ सालको प्रतिनिधिसभा निर्वाचनमा तत्कालीन नेकपा माओवादी केन्द्रका चक्रपाणि खनाल प्रत्यक्षबाट सांसद चुनिँदा अतहर कमाल नेपाली कांग्रेसका तर्फबाट समानुपातिक प्रणालीमार्फत सांसद बनेका थिए । २०७९ सालको निर्वाचनमा भने नेकपा एमालेका बलराम अधिकारी विजयी हुँदा खनाल दोस्रो भएका थिए ।

प्रतिनिधि सभामा रहँदा अतहर कमालले कानुन, न्याय तथा मानव अधिकार समितिका सदस्यका रुपमा काम गरेका थिए । त्यसअघि विधायन समिति, सार्वजनिक लेखा समिति तथा संसदीय सुनुवाइ विशेष समितिमा समेत सक्रिय भूमिका निर्वाह गरेका थिए । संसदीय अभ्यासमा आफ्नो चासो विशेषगरी कानुन निर्माण, सुशासन र मानव अधिकारसँग सम्बन्धित विषयमा केन्द्रित भएको उनी बताउँछन् ।

राजनीतिमा पूर्णकालीन रूपमा संलग्न हुनुअघि उनले २०५० सालदेखि करिब दुई वर्ष शिक्षण पेशामा काम गरेका थिए । शिक्षण अनुभवले उनको सार्वजनिक जीवनमा संवाद र समन्वय क्षमतालाई सुदृढ बनाउन मद्दत गरेको मानिन्छ ।

उनीसँग लुम्बिनी एकीकृत विकास संस्था, कपिलवस्तुको अध्यक्ष तथा सल्लाहकारका रूपमा पनि संलग्न रहेर काम गरेको अनुभव पनि छ । कपिलवस्तुको समग्र विकास, पर्यटन प्रवर्द्धन तथा सामाजिक एकताको सन्देश फैलाउन उनले पहल गरेका थिए ।

अतहर कमाल आफूलाई सामाजिक सद्भाव र सहअस्तित्वका पक्षधर नेताका रूपमा प्रस्तुत गर्छन् । विविध धार्मिक तथा सांस्कृतिक पृष्ठभूमि भएको कपिलवस्तु जिल्लामा उनको राजनीति समावेशी र सन्तुलित दृष्टिकोणमा आधारित रहेको पाइन्छ ।

संविधान निर्माण प्रक्रियामा योगदानको कदरस्वरूप सरकारबाट ‘संविधानसभा पदक’ प्राप्त गरेका उनी दीर्घकालीन राजनीतिक सक्रियता, संगठनात्मक निरन्तरता र संसदीय अनुभवका आधारमा राष्ट्रिय राजनीतिमा स्थिर र प्रभावशाली मानिन्छ ।

तर शेरबहादुर देउवा र गगन थापा पक्षमा विभाजित कांग्रेस मनोविज्ञानलाई एकढिक्का बनाउने, बदलिँदो राजनीतिक समीकरणलाई चिर्ने र बढ्दो जनअपेक्षाबीच स्थानीय विकासका मुद्दा पूरा नहुँदा मतदातामा देखिने असन्तुष्टिलाई सम्बोधन गर्ने चुनौति उनीसामु छन् ।