जित दोहोर्‍याउने चाहना, मत जोगाउन चुनौती

प्रदीप पौडेलका लागि यो निर्वाचन "गत जितको निरन्तरता" पुष्टि गर्ने अग्निपरीक्षा हो। विपक्षी मत विभाजित हुनु उनको लागि सकारात्मक पक्ष हुन सक्छ, तर रास्वपा जस्ता नयाँ शक्तिले काट्ने युवा मतलाई कसरी जोगाउने भन्नेमै उनको जित-हार निर्भर गर्नेछ।

०००

१ चैत २०३२ मा शुक्ला–८, तनहुँमा जन्मिएका प्रदीप पौडेलको बसोबास हाल काठमाडौंको बानियाँटारमा छ । सिद्धार्थ वनस्थली इन्ष्टिच्यूटबाट एसएलसी, अमृत साइन्स क्याम्पस (अस्कल)बाट स्नातक र त्रिविबाट स्नातकोत्तर तह पूरा गरेका उनी नेपालका अन्य धेरै नेताजस्तै विद्यार्थी आन्दोलनबाट राजनीतिमा आएका हुन् ।

पौडेल २०५३ सालमा अस्कल क्याम्पसको स्ववियू सभापति र २०६४ मा नेविसंघको केन्द्रीय अध्यक्ष निर्वाचित भए । २०५९ देखि २०६३ सालसम्म संयुक्त विद्यार्थी आन्दोलनको संयोजक रहेका उनले राजद्रोहको मुद्दा पनि खेपे ।

पौडेल लोकतन्त्र, शान्ति, सुशासन र मानवअधिकारको क्षेत्रमा क्रियाशील विभिन्न राष्ट्रिय–अन्तर्राष्ट्रिय संस्थाहरूमा पनि आबद्ध छन् । एक विद्यालय, एक पुस्तकालय; सार्वजनिक विद्यालय सुधार, हरेक विद्यालय इन्टरनेट एवं ई–लाइब्रेरी अभियानमा लागेर उल्लेख्य संख्यामा गरिब तथा जेहेन्दार विद्यार्थीको लागि छात्रवृत्ति र शैक्षिक सामग्री जुटाएको उनी बताउँछन् ।

संविधानलेखनमा भएको ढिलाइविरुद्ध भएको मेची–महाकाली अभियान, महाभूकम्पपछिको उद्धार तथा पुनर्स्थापना अभियान, युवा उद्यमशीलता अभियान, नेपाली कांग्रेसलाई प्रविधिमैत्री बनाउन डिजिटल एप र कोरोना संक्रमितका लागि प्लाज्मा एप बनाउनेमा नेतृत्वदायी भूमिका खेलेको पौडेलको दाबी छ ।

नेपाली कांग्रेसको विशेष महाधिवेशनबाट महामन्त्री पदमा निर्वाचित हुनुले प्रदीप पौडेलको कद पार्टीभित्र निकै चुलिएको छ। पार्टीको मुख्य नेतृत्व तहमा पुगेका कारण उनलाई कार्यकर्ता परिचालन र स्रोत जुटाउन सहज हुनेछ।

२०६७ बाट लगातार तेस्रो कार्यकाल केन्द्रीय सदस्य रहेका पौडेल कांग्रेसको चौधौं महाधिवेशनमा महासचिवको प्रत्यासी बनेर हारे । पार्टीभित्र प्रश्न गर्दै आएका पौडेल विशेष महाधिवेशनबाट महामन्त्रीमा विजयी भएका छन् । पार्टीभित्रको सफलतालाई मतदाताबाट अनुमोदन गर्न र जितलाई निरन्तरता दिन उनी यसपटक पनि काठमाडौं-५ बाट चुनावी मैदानमा छन् । 

२०७९ सालको निर्वाचनमा तत्कालीन सत्ता गठबन्धनको साझा उम्मेदवार रहेका पौडेलले एमाले नेता ईश्वर पोखरेललाई झन्डै ५ हजारको मतान्तरले पराजित गरेका थिए । भैलै पोखरेलले राप्रपासँग चुनावी तालमेल गरेका थिए । यसपटक पौडेल र पोखरेल दुवैसँग कुनै गठबन्धनको मत छैन ।  

 उनी २०७० सालको निर्वाचनमा तनहुँबाट प्रदेश सभा सदस्यमा ६ मतले पराजित भएका थिए ।

'एक विद्यालय, एक पुस्तकालय' र 'डिजिटल एप' जस्ता आधुनिक र रचनात्मक काममा संलग्न रहेकाले उनलाई काठमाडौँका सचेत र बौद्धिक मतदाताले रुचाउने गरेका छन्। उनको छवि विवादरहित र आशालाग्दो युवा नेताको रूपमा छ।

राम्रो छवि बनाएका नेपालका युवा नेताहरूमध्येका एक प्रदीप पौडेललाई आसन्न चुनावमा आफूप्रतिको समर्थनलाई मतमा बदल्ने चुनौती छ । यसपटक पनि उनले एमालेका ईश्वर पोखरेललाई नै प्रतिस्पर्धी पाएका छन् । साथमा, रास्वपाका सस्मित पोखरेल, उज्यालो नेपालका श्री गुरुङ, राप्रपाका कमल थापा लगायतका प्रतिस्पर्धीहरू पनि मैदानमा छन् ।