बोलेर होइन, काम गरेर देखाउने प्रतिबद्धता 

रास्वपा उम्मेदवार महर्जन पुराना दलप्रतिको निराशलाई मतमा परिणत गर्न आफ्नो दल भरपर्दो वैकल्पिक शक्ति रहेको भन्दै मतदातालाई बुझाइरहेका छन् ।

०००

ललितपुर क्षेत्र नम्बर १ बाट राष्ट्रिय स्वतन्त्र पार्टी (रास्वपा) का बुद्धरत्न महर्जन प्रतिनिधिसभा निर्वाचनमा उम्मेदवार बनेका छन् ।  ४७ वर्षीय महर्जन ललितपुर महालक्ष्मी नगरपालिका, सिद्धिरोडका स्थायी बासिन्दा हुन् । उनी मंगलमान महर्जनका छोरा हुन् ।

बुद्धरत्नले रत्नराज्य क्याम्पसबाट बीएसम्मको औपचारिक शिक्षा लिएका छन् । राजनीतिमा आउनुअघि विभिन्न सामाजिक संस्थामा रहेर काम गरेको अनुभव उनीसँग छ । रास्वपाबाट स्थानीयस्तरमा सक्रिय रहेका बुद्धरत्न २०७९ को चुनावमा ललितपुर क्षेत्र नम्बर २ बाट उम्मेदवार बनेका थिए । त्यतिबेला उनले ८ हजार ६६६ मत ल्याएका थिए ।

गत निर्वाचनमा नेकपा एमालेका प्रेमबहादुर महर्जन १५ हजार २५ मत ल्याएर निर्वाचित हुँदा रास्वपाका बुद्धरत्न ललितपुर-२ मा तेस्रो बन्न पुगे । तर, यसपटक उनले सोही निर्वाचन क्षेत्रबाट प्रतिस्पर्धीको रूपमा आफूलाई उभ्याउन खोजे पनि रास्वपाले ललितपुर-१ बाट टिकट दियो ।

टिकट पाएसँगै गोदावरी नगरपालिका-४ बडिखेल, घट्टेकुलो, इकुडोल, लेले-५, बाग्मती गाउँपालिका-१ घुसेल, प्याङगाउँ, ठूलादुर्लुङ, मानेगाउँ, गोदावरी-११ प्याङगाउँ, गोदामचौर, कार्किटार, दमाइटार जस्ता ठाउँमा घरदैलो र जनसभामा गरेका महर्जनले बोलेरभन्दा पनि काम गरेर देखाउने वाचा मतदातासामु गरिरहेका छन् ।

पुराना दलप्रतिको निराशलाई मतमा परिणत गर्न आफ्नो दल भरपर्दो वैकल्पिक शक्ति रहेको भन्दै मतदातालाई बुझाइरहेका छन् । उनले युवा र परिवर्तनकारी शक्तिलाई मत दिन मतदातालाई आग्रह गरिरहेका छन् ।

तथापि, उनलाई नेकपा एमाले, नेपाली कांग्रेस, नेपाल कम्युनिस्ट पार्टीका प्रभावशाली तथा पुराना उम्मेदवारसँग प्रतिस्पर्धा गर्नुपर्ने चुनौती भने छ ।

महर्जनका मुख्य प्रतिस्पर्धीहरूमा नेकपा एमालेबाट चेतनाथ सञ्जेल, नेपाली कांग्रेसबाट उदयशमशेर राणा, नेकपा माओवादी केन्द्रबाट सुनिल महर्जन लगायतका उम्मेदवार छन् ।