प्रदेशको अनुभव लिएर संघीय संसद् छिर्ने प्रयत्न

नेकपा एमाले ललितपुर क्षेत्र नम्बर १ बाट प्रतिनिधिसभामा उम्मेदवार बनेका सञ्जेल प्रदेशसभामा प्रतिनिधित्व गरिसकेका व्यक्ति हुन् ।

०००

ललितपुर निर्वाचन क्षेत्र नम्बर १ बाट नेकपा एमालेले चेतनाथ सञ्जेललाई प्रतिनिधिसभाको उम्मेदवार बनाएको छ ।  ६० वर्षीय सञ्जेल गोदावारी नगरपालिका टाहाखेलका स्थायी बासिन्दा हुन् । उनी खेमराज सञ्जेलका छोरा हुन् ।

सरस्वती मावि ठेचोबाट एसएलसी पास गरेका उनले त्यसपछि औपचारिक शिक्षा लिएका छैनन् । पहिले बागमती प्रदेशसभा सदस्य रहेका उनी २०७४ सालमा ललितपुर १ (१) बाट निर्वाचित भएका थिए । त्यसबेला आफूले गाउँमा बाटो, बिजुली र अन्य सुविधा पुर्याउन जोड दिएको उनको दाबी छ ।

२०७९ सालको प्रदेशसभा चुनावमा भने सञ्जेल विजयी हुन सकेनन् । यद्यपि, यस पटक एमालेले प्रतिनिधिसभाकै लागि उनलाई उम्मेदवार बनाएको छ । उनले अधुरा विकास पूरा गर्ने र रोजगारी बढाउन भूमिका खेल्ने बताएका छन् । यो क्षेत्रमा कुल मतदाता करिब ७७ हजार ७३७ छन् ।

सञ्जेलका मुख्य प्रतिस्पर्धीहरूमा नेपाली कांग्रेसबाट उदयशमशेर राणा, राष्ट्रिय स्वतन्त्र पार्टीबाट बुद्धरत्न महर्जन, नेकपा (माओवादी केन्द्र) बाट सुनिल महर्जन लगायतका उम्मेदवार छन् ।