युवाका मुद्दा बोकेर संसदीय यात्रातर्फ

ताप्लेजुङको राजनीतिमा यसपटक एउटा नयाँ पुस्ताको नामले विशेष चर्चा पाएको छ-क्षितिज थेबे। नेकपा (एमाले) बाट प्रतिनिधिसभा सदस्यका लागि उम्मेदवार बनेका थेबे अहिले जिल्लाको मात्र होइन, पार्टीभित्रै पनि चासोको केन्द्र बनेका छन् । लामो समयदेखि एमालेको युवा संगठनमा सक्रिय उनी संगठनात्मक राजनीतिबाट संसदीय राजनीतितर्फ उक्लिने प्रयासमा छन् ।

क्षितिज थेबे एमालेनिकट राष्ट्रिय युवा संघ नेपालका पूर्वअध्यक्ष हुन्। पार्टी राजनीतिमा उनी मुख्यतः युवा नेतृत्वका रूपमा चिनिन्छन् । युवासंघको नेतृत्वमा रहँदा उनले युवालाई पार्टीसँग जोड्ने, संगठनलाई सुदृढ बनाउने र नेतृत्व तहमा युवाको उपस्थिति सुनिश्चित गर्ने एजेन्डालाई प्राथमिकता दिए । यही कारण उनी पार्टी अध्यक्ष केपी शर्मा ओली निकट युवा नेताका रूपमा पनि परिचित छन् ।

राजनीतिक रूपमा थेबे संघर्षशील र संगठनमुखी शैलीका नेता मानिन्छन् । युवासंघमा पटक–पटक नेतृत्वमा पुग्नु उनको संगठन चलाउने क्षमताको प्रमाणका रूपमा लिइन्छ । तर यही उदयले उनलाई विवादबाट भने टाढा राख्न सकेन । ताप्लेजुङबाट एमालेको प्रतिनिधिसभा टिकट पाउँदा यसअघि सांसद भइसकेका वरिष्ठ नेता योगेश भट्टराई टिकटबाट बाहिरिनुपरेपछि पार्टीभित्र र बाहिर आलोचना पनि भयो। केहीले थेबेलाई ‘अपरिपक्व’ भने भने केहीले उनलाई ‘युवा पुस्ताको स्वाभाविक दाबी’ का रूपमा व्याख्या गरे ।

संसदीय अनुभव र सरकारी जिम्मेवारीका हिसाबले हेर्दा थेबे नयाँ अनुहार हुन् । उनले अहिलेसम्म प्रतिनिधिसभा सदस्य, मन्त्री वा कुनै राजकीय पद सम्हालेका छैनन् । यही पक्ष उनका लागि कमजोरी पनि हो र अवसर पनि । समर्थकहरू भन्छन्— “उनी नयाँ सोच, नयाँ ऊर्जा र परिवर्तनको प्रतिनिधि हुन् ।”

प्रतिनिधिसभा चुनावमा ताप्लेजुङबाट उनको मुख्य प्रतिस्पर्धा नेपाली कांग्रेस तथा गठबन्धनका उम्मेदवारसँग हुने देखिन्छ । यो चुनाव क्षितिज थेबेका लागि व्यक्तिगत राजनीतिक भविष्यको टर्निङ प्वाइन्ट बन्न सक्छ । जित हासिल गरे उनी युवा संगठनबाट राष्ट्रिय संसदमा प्रवेश गर्ने नयाँ पुस्ताको प्रतिनिधि ठहरिनेछन्; हार भए पनि उनले आफूलाई जिल्लाको मुख्य राजनीतिक पात्रका रूपमा स्थापित गरिसकेको मान्न सकिन्छ ।

अनुभवभन्दा आकांक्षा बलियो भएको पुस्ताका प्रतिनिधि क्षितिज थेबे संगठनात्मक राजनीतिमा आफूलाई स्थापित गरिसकेका नेता हुन् । अब उनी जनमतको कसीमा उत्रँदै छन् । ताप्लेजुङका मतदाताले उनलाई अवसर दिन्छन् कि अनुभवलाई प्राथमिकता दिन्छन्- त्यसको फैसला यस चुनावले गर्नेछ ।