विद्यार्थी राजनीति उदाएका नेता

सिरहा निर्वाचन क्षेत्र नम्बर ३ बाट प्रतिनिधिसभा सदस्यमा उम्मेदवारी दिएका पुजनकुमार सिंह विद्यार्थी राजनीति र संघर्षबाट राष्ट्रिय राजनीतिसम्म आइपुगेका नेता हुन्।

वि.सं. २०४१ चैत २८ गते सिरहाको गोलबजार नगरपालिका–६ मा जन्मिएका सिंहले एमए तहसम्मको अध्ययन गरेका छन्। उनी २०५६ सालमा अखिल क्रान्तिकारीमा सदस्यता लिएर राजनीतिक यात्रा सुरु गरे। +२ तहमा अध्ययन गर्दै गर्दा पार्टीका गतिविधिमा सक्रिय बनेका उनी २०६१ सालमा विद्यार्थी संगठनको जिल्ला सदस्य बने।

केही समय निष्क्रिय भए पनि २०६२/६३ को जनआन्दोलन र त्यसपछिको मधेश आन्दोलनका बेला उनी फेरि सक्रिय रूपमा राजनीतिमा फर्किए। २०६६ सालमा मातृका यादव नेतृत्वको समूहसँग आबद्ध हुँदै नेकपा (माओवादी) मा जिल्ला सदस्य तथा विद्यार्थी संगठनको केन्द्रीय सचिवालय सदस्य बने।

त्यसपछि उनी माओवादी केन्द्रको सचिवालय सदस्य, पार्टीको ३ हजार सदस्यीय केन्द्रीय कमिटी सदस्य हुँदै केन्द्रीय सदस्यसम्म पुगे। २०७० सालको २१औँ राष्ट्रिय सम्मेलनबाट पुनः केन्द्रीय सदस्यमा निर्वाचित भएका सिंह सोही समयमा विद्यार्थी संगठनको मधेश प्रदेश सह–संयोजक बने।

पछिल्ला वर्षहरूमा उनले अखिल क्रान्तिकारीको केन्द्रीय सदस्य, विद्यार्थी संगठनको केन्द्रीय उप–महासचिव, र २०८० सालमा मधेश प्रदेश अध्यक्षको जिम्मेवारी सम्हाले। उनी नेपाल कम्युनिस्ट पार्टीको प्रदेश कमिटी सदस्यसमेत रहिसकेका छन्।

हाल उनी पुरानो पार्टी त्यागेर प्रगतिशील लोकतान्त्रिक पार्टीमा आबद्ध भएका छन् र केन्द्रीय सदस्य तथा सप्तरी इन्चार्जको जिम्मेवारी सम्हाल्दै सिरहा क्षेत्र नम्बर ३ बाट प्रतिनिधिसभा सदस्यमा उम्मेदवारी दिएका छन्।