चाैथाे पटकमा जित निकाल्ने प्रयास

जनता समाजवादी पार्टी (जसपा), नेपाल का मोरङ जिल्ला अध्यक्ष राजकुमार यादवले चुनावमा उम्मेदवारी दिन थालेको यो चौथो पटक हो। मोरङ-५ बाट उम्मेदवारी दिएका यादवले यसअघि नै ह्याट्रिक हारको पीडा सहिसकेका छन्।

२०७० सालको दोस्रो संविधानसभा निर्वाचनमा उनी मोरङ-४ मा उम्मेदवार थिए। सो चुनाव माओवादी केन्द्रका उम्मेदवार शिवकुमार मण्डलले जिते। 

२०७४ सालको चुनावमा मोरङको निर्वाचन क्षेत्र हेरफेर भयो। यो क्षेत्र फेरिएर ४ बाट ५ भयो। राजकुमार यादव २०७४ को चुनावमा पनि उम्मेदवार बने। फेरि चुनाव जिते माओवादीकै मण्डलले।

२०७४ सालमा मण्डलले २२ हजार ९४५ मत सहित चुनाव जित्दा राजकुमार यादवले १८ हजार ६४९ मत पाए। कांग्रेस उम्मेदवार अमृत अर्यालले १९ हजार १५३ मत पाएका थिए।

२०७९ सालको निर्वाचनमा पनि राजकुमार पराजित भए। यसपटक स्वतन्त्र उम्मेदवार योगेन्द्र मण्डलले चुनाव जिते। योगेन्द्र मण्डल २१ हजार ८२० मत सहित विजयी हुँदा दोस्रो भएका शिवकुमार मण्डलले १७ हजार ४८६ मत प्राप्त गरेका थिए। जसपा उम्मेदवार यादवले १७ हजार ३९० मत प्राप्त गरेका थिए।

शिवकुमार मण्डलसँग चौथो र योगेन्द्र मण्डलसँग दोस्रो पटक प्रतिस्पर्धा गरिरहेका यादव आफूले चुनाव जित्ने दाबी गर्छन्। एमालेबाट राजनीति शुरु गरेका उनी मधेश आन्दोलनपछि तत्कालीन मधेशी जनअधिकार फोरममा लागे।

यादव २०६२–६३ को जनआन्दोलनपछिको मधेश आन्दोलनमा सक्रिय भए। मधेश विद्रोहबाट स्थापित नेता यादवले पहिले औषधि पसल चलाएका थिए। जसपाको प्रदेश उपाध्यक्षसम्मको जिम्मेवारीमा पुगेका यादव मधेशकेन्द्रित राजनीतिमा छन्।