‘जोगी सर’को राजनीतिक यात्रा

२५ वर्ष उद्यम विकासको क्षेत्रमा काम गरेका योगेन्द्र मण्डल दोस्रो पटक संसदीय निर्वाचनमा होमिएका छन्। नेकपा एमालेको राजनीति छोडेर उनी गत चुनावमा स्वतन्त्र उम्मेदवार बनेका थिए।

पार्टीले टिकट नदिएपछि मोरङ-५ बाट स्वतन्त्र उम्मेदवार बन्दा पनि उनले जिते। यस पटक भने उनले आफ्नै नेतृत्वमा पार्टी खोलेका छन्।

राष्ट्रिय ऊर्जाशील पार्टी खोलेर उम्मेदवारी दिएका उनको चुनाव चिह्न चापाकल नै हो। स्वतन्त्र चुनाव लड्दा पाएको चिह्नलाई नै उनले पार्टीको चिह्न बनाएका छन्।

उनी जीवन विकास समाजको संस्थापक हुन्। यो संस्था मार्फत जीवन विकास लघुवित्त वित्तीय संस्था, जीवन विकास सामुदायिक अस्पताल, जीवन विकास स्कूल, जीवन विकास डेरी लगायत संस्था सञ्चालन गरेका छन्।

जीवन विकासको चर्चित र ठूलो संस्था जीवन विकास लघुवित्त हो। नेपालको दोस्रो ठूलो लघुवित्त पनि हो। त्यसबाहेक कृषि, वातावरण संरक्षणमा पनि उनको अभियान केन्द्रित छ। योगेन्द्र मण्डलले २ हजार भन्दा बढीलाई प्रत्यक्ष रोजगारी सृजना गरेको दाबी गर्छन् ।

२०५४ सालमा मण्डलले मोरङको अहाहीवरियाती भन्ने स्थानमा जीवन विकास समाज शुरु गरेका थिए। यो स्थान अहिले धनपालथान गाउँपालिकामा पर्छ।

संस्था शुरु गर्नुअघि उनले दुई वर्ष गाउँमा नि:शुल्क ट्युसन पढाए। नि:शुल्क ट्युसन पढाउँदा उनले स्थानीयबाट ‘जोगी सर’को उपनाम पाएका थिए। उनी पछिल्लो केही वर्षयता सामुदायिक विद्यालयको शैक्षिक गुणस्तर सुधारको अभियानमा पनि केन्द्रित छन्।

आफ्नो क्षेत्रका सामुदायिक विद्यालयमा अंग्रेजी माध्यम बनाउन लागेका उनले सहयोग अभियान नै सञ्चालन गरेका छन्। सांसद निर्वाचित भएपछि उनले पाएको सुविधा आफ्नो काममा खर्च गरेनन्। सबै रकम सामाजिक क्षेत्रमा खर्च गरेका थिए।

‘जीवन विकास मार्फत काम गर्दा हामीले केही क्षेत्रमा मात्रै परिवर्तन ल्याउन सक्छौं भन्ने बुझें’ केही समय अघि उनले भनेका थिए, ‘सिस्टम परिवर्तनका लागि नेपालवादको सिद्धान्त लिएर राजनीतिमा आएँ।’