अनुभवी नेताको पुनरागमन प्रयास

महन्थ ठाकुरको नेतृत्वमा रहेको लोसपा र जनता समाजवादी पार्टी नेपाल बीच एकीकरण भएको छ । राष्ट्रिय मुक्ति पार्टी गठन गरेका महतोले जाँतो (चकिया) चुनाव चिह्न लिएका छन् ।

०००

पूर्वउपप्रधानमन्त्री राजेन्द्र महतो सर्लाहीका मतदाताका लागि नौलो नाम होइन । २०४८ सालदेखि सर्लाहीबाट निर्वाचन लड्दै आएका उनी २०७४ मा धनुषाबाट उठेका थिए ।

फागुन २१ को निर्वाचनका लागि सर्लाही–२ बाट उम्मेदवारी दिएका महतो राष्ट्रिय मुक्ति पार्टी, नेपालका केन्द्रीय अध्यक्ष हुन् ।

सर्लाहीको बबरगञ्ज स्थायी घर भएका ६७ वर्षीय महतोले त्रिभुवन विश्वविद्यालयबाट स्नातक गरेका छन् ।  

दिवंगत नेता गजेन्द्रनारायण सिंहबाट प्रभावित महतो सद्भावना परिषद्मा आवद्ध भएर २०४६ सालबाट सक्रिय राजनीतिमा आएका थिए । काठमाडौंमा ट्राभल एजेन्सी, कुरियर, यातायातलगायत क्षेत्रमा काम गरिरहेको अवस्थामा उनको भेट गजेन्द्रनारायण सिंहसँग भयो । २०४६ सालको पञ्चायतविरोधी आन्दोलनकै सन्दर्भमा सिंह काठमाडौं आएका थिए । सिंहको कुरा सुनेपछि महतो सद्भावना परिषद्मा आबद्ध भए ।

त्यसपछिको समयमा उनी सद्भावना पार्टी प्रवक्ता, महासचिव, उपाध्यक्ष र अध्यक्ष भए । राष्ट्रिय जनता पार्टीको अध्यक्षमण्डलको सदस्य, जनता समाजवादी पार्टीको वरिष्ठ नेता, लोसपाको वरिष्ठ नेता हुँदै अहिले आफ्नै नेतृत्वमा पार्टी गठन गरेका हुन् ।

२०४८ सालमा सर्लाहीबाट प्रतिनिधिसभा सदस्यको निर्वाचन लडेका महतो नेपाली कांग्रेसकी मीना पाण्डेसँग १ हजार ३ मतले पराजित भए । २०५१ सालको मध्यावधि चुनावमा उनी सोही क्षेत्रबाट चुनाव लडेर पुरानै प्रतिस्पर्धी पाण्डेसँग ६२२ मतले हारे ।

तेस्रो पटक २०५६ को निर्वाचनमा भने महतोले पाण्डेलाई उही क्षेत्रको प्रतिस्पर्धामा हराए । २०६२–६३ को जनआन्दोलनपछि कांग्रेसका सभापति गिरिजाप्रसाद कोइरालाको नेतृत्वमा बनेको अन्तरिम सरकारमा महतो पहिलो पटक उद्योग, वाणिज्य तथा आपूर्ति मन्त्री बने । त्यसपछिका वर्षहरूमा वाणिज्य तथा आपूर्ति मन्त्री, स्वास्थ्य मन्त्री र उपप्रधानमन्त्री समेत बने ।

२०६४ सालमा सद्भावना पार्टीका अध्यक्ष रहेका महतोले पहिलो संविधानसभा निर्वाचनमा सहज जित हासिल गरे । २०७० को दोस्रो संविधानसभा चुनावमा भने उनी सर्लाही–५ मा महिन्द्र राय यादवसँग पराजित हुनपुगे । २०७४ को निर्वाचनमा महतोले धनुषा–३ मा गएका कांग्रेसका विमलेन्द्र निधिलाई हराए ।

यसपटक पूर्वसहकर्मी महिन्द्रराय यादवसँग प्रतिस्पर्धा गर्न धनुषा–३ छाडेर सर्लाही–२ फर्किएका छन् । २०७४ को चुनावताका तत्कालीन राष्ट्रिय जनता पार्टी, नेपालको अध्यक्षमण्डलमा रहेका दुवैजना आ–आफ्नो क्षेत्रबाट विजयी भएर संसद पुगेका थिए ।

२०७९ को निर्वाचनमा गठबन्धनको समर्थन पाएको नेकपा (माओवादी केन्द्र) बाट उठेका महिन्द्रराय यादवले लोसपाका उम्मेदवार महतो २ हजार ११ मतले पराजित भएका थिए । यादवले माओवादी केन्द्र लगायतका पार्टीहरू मिलेर बनेको नेपाली कम्युनिष्ट पार्टीबाट उम्मेदवारी दिएका छन् ।

महन्थ ठाकुरको नेतृत्वमा रहेको लोसपा र जनता समाजवादी पार्टी नेपाल बीच एकीकरण भएको छ । राष्ट्रिय मुक्ति पार्टी गठन गरेका महतोले जाँतो (चकिया) चुनाव चिह्न लिएका छन् । जनता समाजवादी पार्टीले पनि जाँतो चिह्नबाटै चुनाव लडेको छ । यो रेशम चौधरी संरक्षक भएको नागरिक उन्मुक्ति पार्टी नेपालको चिह्न हो ।