खनालको तेस्रो चुनावी प्रतिस्पर्धा, बारा–४ मा नयाँ परीक्षण

पछिल्लो समय भने एमाले छाडेर उनले सम्मुनत पार्टी नेपाल खोले । निर्वाचनमा भने उनी राष्ट्रिय परिवर्तन पार्टीबाट भाग लिएका छन् । खनाल तराईमा आफ्नो जनमत राम्रो रहेको बताउँछन् । 

०००

नेपाल प्रहरीका पूर्वआईजी सर्वेन्द्र खनाल पनि तेस्रो पटक चुनावी प्रतिस्पर्धामा उत्रिएका छन् । सम्मुनत पार्टी नेपाल गठन गरेका उनै खनाल अहिले राष्ट्रिय परिवर्तन पार्टीबाट बाँसुरी चुनाव चिह्नमा बारा क्षेत्र नम्बर–४ बाट उम्मेदवार बनेका छन् ।

सन् १९६६ मा तनुहँमा जन्मेका ५९ वर्षीय खनाल स्पष्ट र तार्किक वक्ताको रुपमा परिचित छन् । २०४६ सालमा प्रहरी निरीक्षकको रूपमा प्रहरी सेवामा प्रवेश गरेका उनी सर्वोच्च पद आईजीपीसम्म बने ।

२६ चैत २०७४ मा बसेको मन्त्रिपरिषद् बैठकले नेपाल प्रहरीको २६औं आईजीपी खनाललाई बनाउने निर्णय गरेको थियो । २८ चैतमा उपेन्द्रकान्त अर्यालय अवकाशमा गएपछि खनालले प्रहरीको कमान्ड सम्हाले ।

प्रहरी सेवामा रहँदा गुण्डागर्दी, फुटबलको म्याच फिक्सिङजस्ता अपराधहरूको उनले अनुसन्धान गरेका थिए । तराईका पर्सा, धनुषा जस्ता जिल्लामा बसेर उनले कमान्ड गरेका थिए । त्यतिबेला मधेश आन्दोलनपछि तराईमा जन्मिएका विभिन्न सशस्त्र समूहलाई कारबाही गरी कानुनी दायरामा ल्याउन आफूले महत्त्वपूर्ण भूमिका निभाएको उनी बताउने गर्छन् । आफू सेवामा रहँदा गरेको कामबाटै तराईका जनता प्रभावित भएको र तराईमा आफू स्थापित भएको बुझाइकासाथ उनी अहिले बारा झरेका हुन् ।

कुख्यात भारतीय अन्डर वर्ल्ड डन बब्लु दुबेलाई पक्राउ गरेपछि खनालले भारतको समेत पुरस्कार पाएका थिए ।

मधेशमा रहँदा तराई जनतान्त्रिक मुक्तिमोर्चा धनुषा महोत्तरी प्रमुख सुधिर पाण्डे, राजन मुक्ति प्लटुन कमान्डर, ज्वाला समूहका धनुषा, महोत्तरी, सर्लाही इन्चार्ज मरिक यादव, वीरगञ्जमा उत्पाद मच्चाउने गुन्डा नाइके अग्नि भनिने सुनिल जैसवाललाई पनि खनालले पक्राउ गरी कारबाही गरेका थिए ।

सञ्चार उद्यमी जमिम साहको हत्याका मुख्य सुटर जगदिश चन्द पक्राउदेखि ललितपुरको बडिखेलमा एकै परिवारका ५ जनाको हत्याकाण्डको १२ वर्षपछि उनैले पर्दाफास गरेका थिए ।

उनै खनाल आईजीपीसम्म भएर २०७४ चैतदेखि २०७६ माघसम्म गरी करिब २ वर्ष काम गरे । अवकाशको करिब तीन वर्षपछि ६ असोज २०७९ मा औपचारिक रूपमा नेकपा एमालेमा प्रवेश गरे ।

२०७९ सालको निर्वाचनमा उनी काठमाडौं–६ बाट नेकपा एमालेबाट उम्मेदवार बनेका थिए । त्यतिबेला खनाललाई पराजित गर्दै रास्वपाका शिशिर खनाल विजयी भएका थिए । शिशिरले १४ हजार २२१ मत ल्याएर विजयी हुँदा सर्वेन्द्रले ८ हजार ९१७ मत ल्याएका थिए ।

उनै खनाल २०८० मा भएको उपनिर्वाचनमा तनहुँ–१ मा एमालेबाटै उम्मेदवार बने । खनाललाई रास्वपाका डा. स्वर्णिम वाग्लेले पराजित गरेका थिए । वाग्लेले ३४ हजार ९१९ मत ल्याएर विजयी हुँदा खनालले ८ हजार ४८८ मतसहित तेस्रो भएका थिए ।

पछिल्लो समय भने एमाले छाडेर उनले सम्मुनत पार्टी नेपाल खोले । निर्वाचनमा भने उनी राष्ट्रिय परिवर्तन पार्टीबाट भाग लिएका छन् । खनाल तराईमा आफ्नो जनमत राम्रो रहेको बताउँछन् ।