शिक्षा र समाज रुपान्तरणको एजेन्डा

स्थानीय, प्रदेश र शिक्षण क्षेत्रको अनुभव बोकेका बसुन्धरा हुमागाईं शिक्षा र समाज रुपान्तरणका एजेन्डासहित काभ्रे-२ मा प्रतिनिधिसभा निर्वाचनको प्रतिस्पर्धामा छन् ।

०००

नेपाली कम्युनिस्ट पार्टीका उम्मेदवार बसुन्धरा हुमागाईं काभ्रेपलाञ्चोक निर्वाचन क्षेत्र नम्बर २ बाट प्रतिनिधिसभा निर्वाचनमा प्रतिस्पर्धामा छन् ।

२०२७ मंसिर १९ गते पनौती नगरपालिका-१२ मा जन्मिएका हुमागाईं २६ वर्षकै उमेरमा गाविस अध्यक्ष बनेका थिए । किशोरावस्थादेखि नै सामाजिक क्रियाकलाप, सामुदायिक सेवा र समानतामूलक समाज निर्माणका अभियानमा सक्रिय रहँदै आएका उनी स्थानीय स्तरमा परिचित अनुहार हुन् ।

२०७४ सालमा बागमती प्रदेशसभा सदस्य निर्वाचित भएका हुमागाईंले प्रदेश सरकारमा रहँदा कृषि तथा पशुपन्छी विकास मन्त्रीको जिम्मेवारी सम्हाले । मन्त्रीका रूपमा उनले कृषककेन्द्रित कार्यक्रम, पशुपन्छी विकास, सहकारी प्रवर्द्धन तथा ग्रामीण अर्थतन्त्र सुदृढीकरणमा जोड दिएका थिए ।

राजनीतिसँगै उनी विभिन्न सामाजिक तथा संस्थागत भूमिकामा पनि सक्रिय रहँदै आएका छन् । उनी स्थानीय विकास कोषका सदस्य, भुमिडाँडा कृषि सहकारीका अध्यक्ष तथा चुनखानी सामुदायिक वनका अध्यक्ष रहिसकेका छन् ।

केही समय शिक्षण पेसामा संलग्न रहँदा उनले शिक्षा क्षेत्रका समस्या र सम्भावनालाई नजिकबाट बुझ्ने अवसर प्राप्त गरेका छन् ।

शिक्षा क्षेत्रमा उनको योगदान उल्लेखनीय मानिन्छ। स्थानीय इन्द्रादेवी निम्न माध्यमिक विद्यालय र बालप्रकाश माध्यमिक विद्यालयको व्यवस्थापन समितिका अध्यक्षका रूपमा उनले विद्यालय सुधार, शैक्षिक वातावरण सुदृढीकरण तथा समुदायको सहभागिता अभिवृद्धिमा भूमिका खेले । यसै अनुभवका आधारमा उनी सामुदायिक विद्यालय व्यवस्थापन समिति काभ्रेपलाञ्चोकको जिल्ला अध्यक्षसमेत बने ।

समाजवादको यात्रामार्फत देशलाई समावेशी, न्यायपूर्ण र समृद्ध बनाउने लक्ष्यसहित आफू निरन्तर क्रियाशील रहने उनको भनाइ छ ।

राजनीतिक यात्रामा एमाले र एकीकृत समाजवादी हुँदै हालै एकतापछि नेपाली कम्युनिस्ट पार्टीमा आबद्ध भएका हुमागाईं स्थानीय, प्रदेश र राष्ट्रिय राजनीतिमा अनुभव बोकेका उम्मेदवारका रूपमा काभ्रे-२ मा मतदातासामु प्रस्तुत भएका छन् ।

अनुकूलता

• प्रदेशसभा सदस्य तथा मन्त्रीको अनुभव
• स्थानीय तहदेखि प्रदेशसम्मको नेतृत्व यात्रा
• सामाजिक र सहकारी क्षेत्रमा सक्रिय भूमिका

प्रतिकूलता

• पार्टी परिवर्तनका कारण मतदातामा भ्रम
• नयाँ पार्टीको संगठनात्मक संरचना कमजोर
• कडा प्रतिस्पर्धा