व्यवसाय र पर्यटन अनुभवपछि राजनीतिमा फड्को

पर्यटन, प्रविधि र उद्यमशिलताको अनुभव बोकेकी इन्जिनियर ज्योत्सना सैंजु उज्यालो नेपाल पार्टीबाट काभ्रे-२ मा प्रतिनिधिसभा निर्वाचनको प्रतिस्पर्धामा छिन् ।

०००

उज्यालो नेपाल पार्टीबाट काभ्रेपलाञ्चोक निर्वाचन क्षेत्र नम्बर २ की उम्मेदवार हुन् इन्जिनियर ज्योत्सना सैंजु । ४१ वर्षीया सैंजु पेसाले पर्यटन व्यवसायी हुन् । धुलिखेलमा अवस्थित होटल माउन्ट प्रिन्स उनको व्यावसायिक पहिचान हो ।

कम्प्युटर इन्जिनियर सैंजुले सफ्टवेयर कम्पनी नेक्सकोडर्समा कार्य गर्नुका साथै काभ्रे बहुमुखी क्याम्पस, चैतन्य क्याम्पस र काठमाडौँ विश्वविद्यालय स्कुलमा अध्यापन गराएकी छन् । त्यसैगरी, विश्वविद्यालय स्कुल र आईडी बैंकमा आईटी इन्जिनियरका रूपमा समेत उनले अनुभव हासिल गरेकी छन् ।

उनी विभिन्न सामाजिक तथा व्यावसायिक संघ-संस्थामा सक्रिय भूमिकामा रहँदै आएकी छन् । होटल एसोसिएसन काभ्रेको उपाध्यक्ष, महिला उद्यमी संघ काभ्रेको अध्यक्ष, सहारा बालगृहको उपाध्यक्ष, नेवा मिसा दबुको केन्द्रीय सदस्य, युवा उद्यमी मञ्च काभ्रे-२०२४ को अध्यक्ष तथा रोटरी क्लब धुलिखेल-२०२४ की अध्यक्ष भएर उनले नेतृत्वदायी भूमिका निर्वाह गरिसकेकी छन् ।

उनले अमेरिका, अस्ट्रेलिया, भारत, चीन, म्यानमार, थाइल्यान्ड, दक्षिण कोरिया र टर्की लगायतका देशहरूको भ्रमण गरेकी छन् । अन्तर्राष्ट्रिय अनुभवले पर्यटन, उद्यमशिलता र व्यवस्थापनमा उनको दृष्टिकोणलाई फराकिलो बनाएको छ ।

चुनावी एजेन्डामा सैंजुले पर्यटन क्षेत्रलाई पहिलो प्राथमिकतामा राखेकी छन् । उनले पर्यटनलाई देशको प्रमुख आयस्रोत बनाउने लक्ष्य सार्वजनिक गरेकी छन् ।

शिक्षा, सुरक्षा, उद्यमशिलता, नेतृत्व र राजनीतिक समावेशीकरणमा सुधार गर्ने, ऊर्जा निर्यातमा दक्षिण एसियाको नेतृत्व लिने, मल-बिउ बैंक स्थापना गर्दै सिँचाइमा सहजीकरण गरी कृषिमा आधारित आर्थिक केन्द्र निर्माण गर्ने उनको एजेन्डा छ ।  भाषणभन्दा परिणाममा विश्वास गर्ने र काम गरेर देखाउने नेतृत्व आफू बन्ने उनको दाबी छ ।