राजनीतिशास्त्र पढेका उम्मेदवार

२०३५ सालमा जन्मिएका नेपाली कांग्रेसका नेता भीम बडुवाल कैलालीको घोडाघोडी नगरपालिकाका स्थायी बासिन्दा हुन् । २०५० सालदेखि विद्यालय तहदेखि नै राजनीतिमा लागेका उनले राजनीतिशास्त्रमा स्नातकोत्तर गरेका छन् । उनी कानूनमा एलएलबी पनि हुन् ।

बडुवाल विद्यार्थी जीवनमै २०५० सालमा कांग्रेसको विद्यार्थी संगठन नेपाल विद्यार्थी संघबाट रघुनाथ आदर्श माविको इकाइ सचिव बने । उनी दुई वर्षपछि अर्थात् २०५२ मा कैलाली–२ का नेविसंघ क्षेत्रीय सभापति भए ।

उनी २०५५ मा नेविसंघ कैलालीको जिल्ला कोषाध्यक्षको जिम्मेवारी सम्हाल्न पुगे । चार वर्षपछि बडुवाल २०५९ मा नेविसंघ कैलालीको सभापति बने । पार्टी विभाजन हुँदा उनी शेरबहादुर देउवा नेतृत्वको नेपाली कांग्रेस (प्रजातान्त्रिक) को पक्षमा खुले ।

कांग्रेस प्रजातान्त्रिकमा उनले २०६० मा केन्द्रीय प्रचार–प्रसार समितिको सदस्यको जिम्मेवारी पाए । नेता बडुवाल २०६५ मा नेविसंघको केन्द्रीय कार्यसमितिमा सहमहामन्त्री बने ।
उनी २०६७, २०७२ र २०७८ मा गरी तीन पटक कांग्रेसको महाधिवेशन प्रतिनिधि बनिसकेका छन् । बडुवालले २०६७ मा कांग्रेस कैलालीको सचिव बन्ने अवसर पाए ।
२०७२ सालमा बडुवालले कांग्रेस कैलालीको नेतृत्वका सभापति पदमा उम्मेदवारी दिए । तर, उनी सफल हुन सकेनन् । नेता बडुवाल २०७८ मा कांग्रेस कैलालीको उपसभापतिमा निर्वाचित भए ।

२०७२ र २०७८ मा कांग्रेसको महासमिति सदस्य भइसकेका बडुवाल गत पुसमा आयोजित पार्टीको दोस्रो विशेष महाधिवेशनको पक्षमा खुले । विशेष महाधिवेशनबाट सभापतिमा चयन भएका गगनकुमार थापाले उनै बडुवाललाई आसन्न निर्वाचनमा कैलाली–३ बाट प्रतिनिधिसभा सदस्य उम्मेदवार बनाएका छन् ।

यो क्षेत्रमा उनीसँग नेकपा एमालेका गौरीशंकर चौधरी, नेपाली कम्युनिष्ट पार्टीका वीरमान चौधरी र राष्ट्रिय स्वतन्त्र पार्टी (रास्वपा) का जगतप्रसाद जोशी सहित १० जना चुनावी प्रतिस्पर्धामा छन् । बडुवाल पहिलो पटक संसदीय निर्वाचनका लागि चुनावी प्रतिस्पर्धामा उत्रिएका हुन् ।

प्रतिनिधिसभा निर्वाचन २०७९ मा कैलाली–३ बाट नागरिक उन्मुक्ति पार्टीका उम्मेदवार गंगाराम चौधरी विजयी भएका थिए । उनले २३ हजार १२० मत पाएका थिए ।
चौधरीका निकटतम प्रतिद्वन्द्वी नेकपा माओवादी केन्द्रका कृष्णकुमार चौधरीले १७ हजार ७४९ मत ल्याएका थिए । निर्वाचनमा उनलाई बडुवालको दल कांग्रेसले सहयोग गरेको थियो ।

कैलाली–३ मा एमालेबाट अहिले उम्मेदवार रहेका गौरीशंकर चौधरी अघिल्लो निर्वाचनमा तेस्रो भएका थिए । निर्वाचन आयोगको तथ्यांक अनुसार उनले ९ हजार ८७४ मत पाएका थिए । चौथो भएका राष्ट्रिय प्रजातन्त्र पार्टी (राप्रपा) का वीरेन्द्रबहादुर बमले ७ हजार ४५ मत ल्याएका थिए । उनी अहिले पनि उम्मेदवार छन् ।

प्रस्तुतिः केशव सावद