क्रिकेट मैदानबाट राजनीतिक रंगशालातर्फ

क्रिकेट मैदानको अनुशासन, समाजकार्यको संवेदनशीलता र उद्यमशीलताको व्यावहारिक अनुभव बोकेर उनी यसपटक धनकुटाबाट संसदीय राजनीतिमा होमिएका छन्।

000

धनकुटाको पाख्रिबास नगरपालिका–८ मा जन्मिएका बिभत्सु थापा नेपाली समाजका फरक–फरक क्षेत्र भोग्दै राजनीतिमा प्रवेश गरेका युवा पात्र हुन्। क्रिकेट मैदानको अनुशासन, समाजकार्यको संवेदनशीलता र उद्यमशीलताको व्यावहारिक अनुभव बोकेर उनी यसपटक धनकुटाबाट संसदीय राजनीतिमा होमिएका छन्।

३० वर्षीय थापा पिता विराट थापा र माता संगिता थापाका सन्तान हुन्। समाजकार्य विषयमा स्नातक (बी.एस.डब्ल्यू) अध्ययन गरेका उनले २०७२ देखि २०७६ सम्मको शैक्षिक यात्रामा समाजका कमजोर वर्ग, फरक क्षमता भएका बालबालिका र कठिन परिस्थितिमा श्रम गर्न बाध्य बालबालिकासँग प्रत्यक्ष काम गर्ने अवसर पाए। यस अनुभवले सामाजिक यथार्थ बुझ्ने र समाधान खोज्ने दृष्टिकोण विकास गरेको उनी बताउँछन्।

खेलकुद क्षेत्र थापाको अर्को पहिचान हो। नेपाललाई यू–१९ स्तरको क्रिकेटमा प्रतिनिधित्व गरेका उनी त्यसपछि पनि विभिन्न राष्ट्रिय प्रतियोगितामा सक्रिय रहे। क्रिकेटले दिएको अनुशासन, प्रतिस्पर्धा र टोलीभाव नै अहिलेको जीवन र राजनीतिमा समेत उपयोगी भएको उनी बताउँछन्।

२०७७ सालदेखि व्यवसाय क्षेत्रमा सक्रिय थापाले जुत्ता उत्पादन कारखाना सञ्चालन गर्दै स्थानीय स्तरमै रोजगारी सिर्जना गरिरहेका छन् । उद्योगमार्फत आर्थिक गतिविधि बढाउँदै युवालाई स्वदेशमै अवसर दिन सकिन्छ भन्ने विश्वास उनको छ। साथै, खेलकुदसम्बन्धी विषयमा कन्टेन्ट राइटिङ गर्दै आएका थापाका लेखहरू विभिन्न माध्यममा प्रकाशित भइसकेका छन्।

राजनीतिमा थापा पूर्व प्रधानमन्त्री सूर्यबहादुर थापाको विरासतसँग जोडिएर आएका हुन्। धनकुटाबाट पाँच पटक प्रधानमन्त्री बनेका सूर्यबहादुर थापाको राजनीतिक उत्तराधिकार राप्रपाले निरन्तरता दिनुपर्ने दाबी गर्दै पार्टीले थापालाई उम्मेदवार बनाएको हो।

सूर्यबहादुर थापाका छोरा सुनिलबहादुर थापा २०७० र २०७४ मा राप्रपाबाट निर्वाचित भए पनि २०७९ मा कांग्रेस प्रवेश गरेपछि धनकुटाको राजनीतिक समीकरण फेरिएको छ। यही सन्दर्भमा राप्रपाले नयाँ पुस्ताबाट विरासत जोगाउने प्रयासस्वरूप बिभत्सु थापालाई अघि सारेको हो ।

थापा आफूलाई केवल विरासतको प्रतिनिधि होइन, खेल, समाज र उद्योगबाट खारिएको युवा उम्मेदवारका रूपमा प्रस्तुत गर्न चाहन्छन्। उनी भन्छन्— 'धनकुटामा सम्भावना धेरै छन्, तर अवसर कम। राजनीतिले उत्पादन, रोजगारी र युवालाई केन्द्रमा राख्नुपर्छ।'

अनुकूलता

• क्रिकेट खेलाडी युवा
• समाजिक कार्यमा संलग्न र उद्यमी छवि
• सूर्यबहादुर थापाको राजनीतिक विरासतसँग जोडिएको पहिचान

प्रतिकूलता

• संसदीय राजनीति र चुनावी अनुभवको कमी
• परिवारको विरासत बाहेक स्पष्ट एजेन्डा र दीर्घकालीन दृष्टिकोण प्रभावकारी रूपमा प्रस्तुत गर्नुपर्ने चुनौती
• कांग्रेस, एमाले दलको बलियो संगठनबीचलाई चिर्नुपर्ने अवस्था