विरासत जोगाउने चुनौती

यो क्षेत्र २०७९ को चुनावमा तत्कालीन माओवादी केन्द्रले जितेको थियो । हाल माओवादी र एकीकृत समाजवादी मिलेर नेपाली कम्युनिस्ट पार्टी बनेको छ । सोही पार्टीबाट उनी उम्मेदवार भएका हुन् ।

०००

नेपाली कम्युनिस्ट पार्टी (नेकपा) को तर्फबाट विशाल खड्काले एउटा मात्र निर्वाचन क्षेत्र रहेको दोलखाबाट उम्मेदवारी दिएका छन् । ४४ वर्षीय खड्का दोलखाको गौरीशंकर गाउँपालिकामा जन्मिएका हुन् ।

निम्न मध्यमवर्गीय किसान परिवारमा जन्मिएका उनले स्नातकसम्मको अध्ययन पूरा गरेका छन् ।  उनको राजनीतिक यात्रा २०५४ सालदेखि नेकपा (माओवादी) को पूर्णकालीन कार्यकर्ताका रूपमा होमिएर सुरु भएको थियो । उनले १६ वर्षको उमेरमै १८ वटा राज्यविरुद्धका मुद्दा खेप्नुपरेको थियो ।

परिवारिक पृष्ठभूमि पञ्चायतकालदेखि नै वामपन्थी राजनीतिमा रहेकाले उनले २०५३ सालबाटै अखिल क्रान्तिकारीबाट राजनीति थालेका थिए ।

२०७४ को निर्वाचनमा आइपुग्दा माओवादी केन्द्रबाट दोलखा (१) ‘क’ बाट बागमती प्रदेशसभा सदस्य निर्वाचित भए । प्रदेश सरकारमा वन तथा वातावरण मन्त्रीको जिम्मेवारी पनि सम्हाले । त्यसअघि २०७० सालको संविधानसभा चुनावमा भने उनी पराजित भएका थिए ।

खड्का तत्कालीन माओवादी केन्द्रको दोलखा जिल्ला इन्चार्ज पनि रहिसकेका छन् । हाल नेकपाको केन्द्रीय सदस्य हुन् ।

हाम्रो रेडियो दोलखा, शहीद रितबहादुर खड्का स्मृति प्रतिष्ठान, निलकण्ठेश्वर उच्च मावि र शहीद स्मृति आवासीय विद्यालयको व्यवस्थापकीय भूमिकामा रहेर काम गरेको अनुभव उनीसँग छ ।

यो क्षेत्रमा २०७९ को चुनावमा तत्कालीन माओवादी केन्द्रले जितेको थियो । हाल माओवादी र एकीकृत समाजवादी मिलेर नेपाली कम्युनिस्ट पार्टी बनेको छ । सोही पार्टीबाट उनी उम्मेदवार भएका हुन् ।

यस पटक उनलाई नयाँ दलसँगै कांग्रेस, एमालेका उम्मेदवारलाई पराजित गर्नुपर्ने चुनौती छ ।