भक्तपुर–२ मा चौथो प्रतिस्पर्धा, दोस्रो जितको खोजी

नेकपा एमालेको ११ औं महाधिवेशनबाट सचिव पदमा निर्वाचित महेश बस्नेत भक्तपुर–२ का लागि पुनः उम्मेदवार बनेका छन्। महाधिवेशनबाट ९ सचिव निर्वाचित हुँदा बस्नेतले उक्त पदका प्रतिस्पर्धीमध्ये सर्वाधिक मत प्राप्त गरेका थिए।

भक्तपुर–२ मा कांग्रेस भक्तपुरका सभापति दुर्लभ थापासँग अघिल्लोपटक पराजित भएका बस्नेतका लागि यसपटक प्रतिस्पर्धीहरू नयाँ छन्। ५१ वर्षीय बस्नेतले संसदीय निर्वाचनमा यसअघि तीनपटक प्रतिस्पर्धा गरे पनि २०७४ सालको निर्वाचनबाहेक अन्यमा जित हासिल गर्न सकेनन्।

२०३१ साल माघमा भक्तपुरमा जन्मिएका महेश बस्नेत २०४९ सालमा एमालेको साधारण सदस्य भएका थिए। त्यसयताको उथलपुथलपूर्ण राजनीतिमा एमालेभित्र राम्रो प्रगति गर्ने नेतामा उनी पर्छन्। पार्टी अध्यक्ष केपी शर्मा ओलीका ‘खास पात्र’ मानिने बस्नेत जेनजी आन्दोलनपछि एमालेबाट सार्वजनिक प्रतिक्रिया व्यक्त गर्ने पहिलो व्यक्ति थिए।

विपक्षीप्रति खरो टिप्पणी गरेर चर्चामा आइरहने बस्नेत यसै क्षेत्रमा अवस्थित सूर्यविनायक नगरपालिका–७ का स्थायी बासिन्दा हुन्। कानुनमा स्नातकसम्म अध्ययन गरेका उनले २०५४ सालदेखि नै निर्वाचनमा प्रतिस्पर्धा गर्न थालेका हुन्। २०५४ सालको स्थानीय निकायको निर्वाचनमा उनी गुण्डु गाविसको अध्यक्षमा निर्वाचित भएका थिए।

त्यतिबेला २३ वर्ष पुगेका उनी देशभरका निर्वाचित गाविस अध्यक्षमध्ये सबैभन्दा कान्छा थिए। बस्नेतले जुन स्थानमा गाविस अध्यक्ष जिते, त्यही ठाउँमा पार्टी अध्यक्ष ओलीको निवास बनाउन उनी सक्रिय भएर लागे। जेनजी आन्दोलनपछि बालकोटस्थित निवास ध्वस्त भएपछि बस्नेतकै पहलमा अध्यक्ष ओलीका लागि गुण्डुमा भाडाको घरको व्यवस्था गरिएको छ।

तत्कालीन माओवादीको युवा संगठन वाइसिएलसँग मुकाबिला गर्न एमालेद्वारा गठित ‘युथ फोर्स’का संस्थापक अध्यक्ष बस्नेत हुन्। शान्ति प्रक्रियामा आइसकेपछि पनि वाइसिएलको ज्यादती कायमै रहेको भन्दै प्रतिवाद गर्न एमालेले बस्नेतको नेतृत्वमा उक्त दस्ता गठन गरेको थियो।

त्यसपछि सहरमा वाइसिएल र युथ फोर्सबीच दैनिकजसो भिडन्त हुने अवस्था सिर्जना भयो। पछि माउ पार्टीहरूले ती सांगठनिक संरचनालाई केही समयका लागि स्थगित गरे।

‘वाईसिएलको बलमिच्याइँको प्रतिकार गरेको’ जससँगै एमालेले उनलाई २०७० सालको दोस्रो संविधानसभा निर्वाचनमा भक्तपुर–२ बाट टिकट दियो। तर, उनी नेपाली कांग्रेसका रामेश्वर ढुंगेलसँग पराजित भए।

२०७१ सालमा एमाले अध्यक्षमा ओली निर्वाचित भएसँगै उनी पार्टीमा शक्तिशाली हुँदै गए। पहिलोपटक संसदीय चुनाव नजिते पनि ओलीले उनलाई मन्त्री बनाए। २०७२ सालको संविधान जारी हुनुअघि सांसद नभए पनि ६ महिनासम्म मन्त्री हुन पाउने व्यवस्थाअनुसार बस्नेतलाई अध्यक्ष ओलीले मन्त्री बनाएका थिए। बस्नेत २०७१ भदौदेखि २०७२ असोजसम्म उद्योगमन्त्री बने।

प्रतिनिधिसभाका लागि उम्मेदवार हुन उनले दोस्रोपटक २०७४ सालको निर्वाचनमा टिकट पाए। एमाले–माओवादी केन्द्रको वाम गठबन्धन भएको उक्त निर्वाचनमा उनले भक्तपुर–२ मा कांग्रेसका उम्मेदवार दमननाथ ढुंगानालाई पराजित गर्दै प्रतिनिधिसभा सदस्य जिते।

बस्नेत अहिले भक्तपुर–२ मा चौथोपटक प्रतिस्पर्धामा छन्। यस क्षेत्रमा कांग्रेसले नयाँ अनुहारलाई प्रतिस्पर्धी बनाएको छ। बस्नेतका प्रतिस्पर्धीका रूपमा कांग्रेसका कविर राणा, रास्वपाका राजीव खत्री, उज्यालो नेपाल पार्टीका जितराम लामा र प्रगतिशील लोकतान्त्रिक पार्टीका जन्मदेव जैसी लगायत मैदानमा छन्।

भक्तपुर–२ मा यसपटक दलगत र स्वतन्त्र गरी कुल ३२ जना उम्मेदवार चुनावी प्रतिस्पर्धामा छन्।