स्वास्थ्य, स्वरोजगार र भ्रष्टाचारमुक्त प्रशासन प्रमुख एजेन्डा

रास्वपाका उम्मेदवार साहले विशेषगरी स्वास्थ्य सेवामा सुधार, युवा स्वरोजगार र भ्रष्टाचार मुक्त प्रशासनलाई प्राथमिकतामा राखेका छन् ।

०००

महोत्तरी क्षेत्र नम्बर २ बाट राष्ट्रिय स्वतन्त्र पार्टी (रास्वपा) का दीपककुमार साह प्रतिनिधिसभाका लागि उम्मेदवार बनेका छन् ।

२०४७ साल चैत १० गते महोत्तरीमा जन्मिएका ३३ वर्षीय साहको महोत्तरी गाउँपालिका नै स्थायी ठेगाना हो । आफ्नो जन्मस्थान र जिल्लाको समस्यालाई नजिकबाट बुझेका साह स्थानीय माटोसँग भिजेका उम्मेदवार मानिन्छन् ।

राजनीतिमा परिवर्तन र सुशासनको एजेन्डा लिएर मैदानमा उत्रिएका साहको पृष्ठभूमि व्यावसायिक र प्राज्ञिक रूपमा निकै सबल देखिन्छ ।

उनले जनस्वास्थ्य विषयमा स्नातकोत्तरसम्मको अध्ययन पूरा गरेका छन् । उनले विश्वकै प्रतिष्ठित शिक्षण संस्था लन्डन स्कुल अफ हाइजिन एन्ड ट्रपिकल मेडिसिन र इन्स्टिच्युट अफ मेडिसिनबाट शिक्षा हासिल गरेका छन् ।

राजनीतिमा पूर्णकालीन हुनुअघि साहले स्वास्थ्य र विकासको क्षेत्रमा अन्तर्राष्ट्रिय स्तरको अनुभव सँगालेका छन् । उनले विश्व स्वास्थ्य संगठन र एफएचआई ३६० जस्ता ख्यातिप्राप्त संस्थाहरूमा काम गरिसकेका छन् ।

रास्वपाबाट चुनावी मैदानमा होमिएका साहले विशेषगरी स्वास्थ्य सेवामा सुधार, युवा स्वरोजगार र भ्रष्टाचार मुक्त प्रशासनलाई प्राथमिकतामा राखेका छन् । एउटा दक्ष विज्ञ राजनीतिमा आउनुपर्छ भन्ने मान्यतालाई उनले आत्मसात गरेका छन् ।

अनुकूलता

• सबल शैक्षिक र व्यावसायिक पृष्ठभूमि
• स्थानीय समस्या बुझ्ने स्थानीय उम्मेदवार
• स्पष्ट एजेन्डा र नयाँ राजनीतिक छवि

प्रतिकूलता

• प्रत्यक्ष राजनीतिक अनुभव सीमित
• स्थानीय शक्ति संरचनासँग प्रतिस्पर्धा
• एजेन्डा कार्यान्वयनको परीक्षण बाँकी