संसद्‍मा दुई दशकको अनुभव, प्रत्यक्षमा दोस्रो जित खोज्दै

महतो विगत १८ वर्षदेखि संसदीय अभ्यासमा सक्रिय रहँदै आएकी छिन् । २०६४ देखि २०८२ सालसम्म चार वर्ष बाहेक उनी निरन्तर संसद्‌सँग जोडिएकी छिन् ।

निवर्तमान प्रतिनिधिसभा सदस्य तथा धनुषा-३ बाट नेकपा एमालेकी उम्मेदवार जुलीकुमारी महतो संसदीय राजनीतिमा अनुभवी नेतृ हुन् ।

धनुषाका मिथिलाविहारी नगरपालिका-३ घर भएकी ४९ वर्षीया महतो विगत १८ वर्षदेखि संसदीय अभ्यासमा सक्रिय रहँदै आएकी छिन् । २०६४ देखि २०८२ सालसम्म उनी निरन्तर संसद्‌सँग जोडिएकी छिन् ।

शिक्षामा स्नातक गरेकी उनी विद्यार्थी जीवनदेखि नै सामाजिक–राजनीतिक चेतनामा सक्रिय रहँदै आएकी छिन् । २०४६ सालबाट अनेरास्ववियुबाट आफ्नो राजनीतिक यात्रा सुरु गरेकी महतो २०६४ सालमा समानुपातिक प्रणालीमार्फत संविधानसभा सदस्य बन्दै संसद् प्रवेश गरेकी थिइन् ।

नेकपा एमालेका वर्तमान उपमहासचिव रघुवीर महासेठकी श्रीमतीसमेत रहेकी महतोले आफ्नो राजनीतिक यात्रामा केही उतारचढाव पनि झेलेकी छिन् ।

पहिलो पटक संविधानसभा निर्वाचन २०७० मा उनले धनुषा-३ बाट प्रत्यक्ष चुनाव लडेकी थिइन् । उक्त निर्वाचनमा उनी नेपाली कांग्रेसका उम्मेदवार विमलेन्द्र निधिसँग १ हजार ४९२ मतान्तरले पराजित हुन पुगिन् । निधिले १५ हजार ३१ मत प्राप्त गर्दा जुली महतोले १३ हजार ५३९ मत पाएकी थिइन् । यसपटक पनि उनी कांग्रेसका निधिसँगै प्रतिस्पर्धामा छिन् ।

२०७४ सालमा उनी प्रतिनिधिसभा सदस्यमा समानुपातिक सांसद बनेकी थिइन् । त्यस बेला २०७७ मा केपी शर्मा ओली नेतृत्वको सरकारमा महिला, बालबालिका तथा ज्येष्ठ नागरिक मन्त्रीको रूपमा जिम्मेवारी सम्हालिन् ।

२०७९ को प्रतिनिधिसभा निर्वाचनमा उनी धनुषा–३ बाट पहिलोपटक प्रत्यक्ष निर्वाचन जित्दै संसद्मा प्रवेश गरिन् । पाँचदलीय गठबन्धनका उम्मेदवार लोकतान्त्रिक समाजवादी पार्टी (लोसपा)का नेता अनिल झालाई उनले ९ हजार ७०२ मतान्तरले पराजित गरेकी थिइन् । महतोले ३३ हजार ३८८ मत प्राप्त गर्दा झाले २३ हजार ६८६ मत पाएका थिए ।

पार्टी संगठनमा पनि सक्रिय भूमिका निर्वाह गर्दै आएकी महतो २०७४ सालमा नेकपा एमालेको केन्द्रीय समिति सदस्य बनेकी थिइन् । २०७५ मा उनी धनुषा जिल्ला सह–इन्चार्जको जिम्मेवारीमा रहिन् भने पछि पोलिटब्युरो सदस्यसम्म पुगिन् ।

हाल पनि उनी पार्टीको केन्द्रीय सदस्यको रूपमा सक्रिय छिन् । मधेशमा संगठन सुदृढीकरण तथा एमालेको आधार विस्तारमा उनको भूमिका उल्लेखनीय मानिन्छ ।