विद्यार्थी राजनीतिबाट हुर्केका भट्टराई रुपन्देहीको भूमि र माटोसँग गहिरो रूपमा जोडिएका, कुशल संगठक र वैचारिक रूपमा परिपक्व नेतृत्वका रूपमा परिचित छन् ।
०००
नेकपा एमालेले रुपन्देही क्षेत्र नम्बर ५ मा खिमलाल भट्टराईलाई प्रतिनिधिसभा सदस्यको उम्मेदवार बनाएको छ । २०२७ सालमा गुल्मी दिगाममा जन्मेका भट्टराई रुपन्देहीको सैनामैना नगरपालिका–५ सेरवाका स्थायी बासिन्दा हुन् ।
बुटवल बहुमुखी क्याम्पसबाट कानुनमा स्नातक गरेका भट्टराईले त्रिभुवन विश्वविद्यालय कीर्तिपुरबाट राजनीतिशास्त्रमा स्नातकोत्तर अध्ययन पूरा गरेका छन् ।
विद्यार्थी राजनीतिबाट खारिएर पार्टी राजनीतिमा उदाएका उनी अनुभवी र ऊर्जाशील नेता हुन् । विद्यार्थी राजनीतिबाट हुर्केका उनी रुपन्देहीको भूमि र माटोसँग गहिरो रूपमा जोडिएका, कुशल संगठक र वैचारिक रूपमा परिपक्व नेतृत्वका रूपमा परिचित छन् ।
२०४२ सालमा अनेरास्ववियु (एकताको पाँचौं) को विद्यालय प्रारम्भिक कमिटी अध्यक्षको रूपमा संगठित भएका उनीले २०४५ सालमा नेपाल-भारत सम्बन्ध बिग्रेको, भारतीय नाकाबन्दीले नुन–तेल अभाव भएको बेला सञ्चालित आन्दोलनमा सहभागी भएवापत प्रहरीद्वारा गिरफ्तार भई ६ महिना भैरहवा र पाल्पामा जेल जीवन व्यतित गरेका छन् ।
२०४६ सालको जनआन्दोलनमा सक्रिय सहभागी भएका भट्टराईले २०४७ सालमा पार्टीको सदस्यता लिएका थिए ।
२०४९ सालको स्ववियु चुनावमा उनी बुटवल बहुमुखी क्याम्पसमा स्ववियु सभापति निर्वाचित भए । अनेरास्ववियुको २०५१ सालमा सम्पन्न एघारौं राष्ट्रिय सम्मेलनबाट केन्द्रीय सदस्यमा निर्वाचित भट्टराई त्यसपछिका बाह्रौं/तेह्रौं/चौथौं/पन्ध्रौं र १६औं राष्ट्रिय सम्मेलनहरूबाट क्रमशः केन्द्रीय कमिटी सदस्य, सचिवालय सदस्य, विभागीय प्रमुख सचिव/महासचिवको जिम्मेवारी पूरा गरेका थिए ।
२०६१ सालमा सम्पन्न अनेरास्ववियुको सत्रौं राष्ट्रिय सम्मेलनबाट अध्यक्षमा सर्वसम्मत चयन भएका भट्टराई २०६२/०६३ को ऐतिहासिक जनआन्दोलनमा अनेरास्ववियुबाट नेतृत्वदायी भूमिकामा थिए ।
२०६२ सालमा अनेरास्ववियुबाट बिदा भएपछि नेकपा (एमाले) उपत्यका समन्वय कमिटीको सदस्य भई केही समय काम गरेका र तत्पश्चात् लुम्बिनी अञ्चल समन्वय कमिटी सदस्य, २०६७/६८ मा लुम्बिनी अञ्चल समन्वय कमिटीको सचिव चयन भई जिम्मेवारी पूरा गरेका थिए ।
पार्टीको आठौं राष्ट्रिय महाधिवेशनमा केन्द्रीय सदस्यमा पराजित भएका उनी नवौं र दशौं राष्ट्रिय महाधिवेशनबाट केन्द्रीय सदस्यमा निर्वाचित भए । दशौं महाधिवेशनपछि पोलिटब्युरो सदस्य भए । यसबीचमा उनले कपिलवस्तु,गल्मी र रुपन्देही इन्चार्ज र अनेरास्ववियु इन्चार्ज, केन्द्रीय विपद् व्यवस्थापन तथा स्वयंसेवा विभाग प्रमुख भएर काम गरे ।
२०७४ फागुनदेखि राष्ट्रिय सभा सदस्य र मुख्य सचेतक, राष्ट्रिय सभामा विपक्षी दलको नेताको भूमिका निभाएका उनी एघारौं राष्ट्रिय महाधिवेशनबाट खुला क्षेत्रबाट केन्द्रीय सदस्यमा निर्वाचित भए ।
भट्टराईले लुम्बिनी क्षेत्रमा अन्तर्राष्ट्रियस्तरको अस्पताल, लुम्बिनीलाई अन्तर्राष्ट्रियस्तरमा ब्रान्डिङ गरी अहिलेभन्दा दोब्बर पर्यटक भित्र्याउने योजना बनाएर कार्यान्वयन, अव्यवस्थित बसोबासी र सुकुम्बासीको समस्या समाधान, गुणस्तरीय शिक्षा, कृषिको आधुनिकीकरणलाई उनले प्राथमिकतामा राखेका छन् ।
१ लाख ३४ हजार ४४२ मतदाता रहेको यो क्षेत्रमा २०७९ को चुनावमा एमालेले सबैभन्दा बढी २१ हजार ६३३, नेपाली कांग्रेसले १९ हजार ८४८, जनमत पार्टीले १३ हजार ३३४, रास्वपाले ८ हजार ८८५ र नेकपाले ४ हजार ८९६ समानुपातिक मत पाएका थिए ।
